മദ്യവില്‍പനശാല ദൂരപരിധി; കേരളത്തിന് ഇളവില്ല

ന്യൂഡല്‍ഹി: ദേശീയ, സംസ്ഥാന പാതയോരങ്ങളില്‍ മദ്യവില്‍പനശാലകള്‍ക്കു ദൂരപരിധി നിര്‍ദേശിച്ച ഉത്തരവില്‍ കേരളത്തിന് ഇളവില്ല. മദ്യശാലകള്‍ മാറ്റിസ്ഥാപിക്കാന്‍ കൂടുതല്‍ സമയം അനുവദിക്കാനാവില്ലെന്നു വ്യക്തമാക്കിയ കോടതി ഹര്‍ജി കാലഹരണപ്പെട്ടതാണെന്നും നിരീക്ഷിച്ചു. അതേസമയം, ദൂരപരിധിയില്‍ അരുണാചല്‍ പ്രദേശിനും ആന്‍ഡമാനും കോടതി ഇളവുനല്‍കി.

ഉത്തരവുകള്‍ നടപ്പാക്കാന്‍ മൂന്നു മാസംകൂടി സമയം വേണമെന്നായിരുന്നു കഴിഞ്ഞ ഏപ്രില്‍ ആദ്യവാരം കേരളം നല്‍കിയ അപേക്ഷയിലെ പ്രധാന ആവശ്യം.

ഉത്തരവ് മറികടക്കാന്‍ സംസ്ഥാനപാതകളെ പ്രധാന ജില്ലാ പാതകളെന്നു പുനര്‍നാമകരണം ചെയ്ത ചണ്ഡിഗഡ് ഭരണകൂടത്തിന്റെ നടപടിയില്‍ ഇടപെടില്ലെന്നു സുപ്രീം കോടതി കഴിഞ്ഞ ദിവസം വ്യക്തമാക്കിയിരുന്നു. ദൂരപരിധി ഉത്തരവു പരിഷ്‌കരിക്കണമെന്നാവശ്യപ്പെട്ടുള്ള സ്വകാര്യ അപേക്ഷകളും കോടതി തള്ളി. കേരളത്തിലെ സ്വകാര്യ വൈന്‍, ബീയര്‍ പാര്‍ലറുകളുടെയും ചില ഫോര്‍ സ്റ്റാര്‍ ഹോട്ടലുകളുടെയും എഐടിയുസി തുടങ്ങിയവയുടെയും അപേക്ഷകളും ഇതിലുള്‍പ്പെടും.

SHARE