കസബ സിനിമ വിവാദത്തില്‍ ഒടുവില്‍ മറുപടിയുമായി മമ്മൂട്ടി

 

നടി പാര്‍വതിയുടെ കസബ സിനിമയെ കുറിച്ചുള്ള വിവാദ പരാമര്‍ശവുമായി ബന്ധപ്പെട്ട് സോഷ്യല്‍ മീഡിയയില്‍ തര്‍ക്കം മൂക്കുന്നതനിടെ വിവാദത്തില്‍ തന്റെ മറുപടിയുമായി നടന്‍ മമ്മൂട്ടി രംഗത്ത്. ഒരു ഓണ്‍ലൈന്‍ മാധ്യമത്തിന് നല്‍കിയ അഭിമുഖത്തിലാണ് നടി പരാമര്‍ശത്തെ കുറിച്ച് മമ്മൂട്ടി തന്റെ അഭിപ്രായം വ്യക്തമാക്കിയത്. തനിക്കു വേണ്ടി പ്രതികരിക്കാനോ പ്രതിരോധിക്കാനോ ആരേയും ഇന്നേ വരെ ചുമതലപ്പെടുത്തിയിട്ടില്ലെന്നും ആവിഷ്‌കാര സ്വാതന്ത്ര്യം പോലെ പ്രധാനപ്പെട്ടതാണ് അഭിപ്രായ സ്വാതന്ത്യമെന്നും അദ്ദേഹം പറഞ്ഞു. വിവാദത്തിന്റെ പുറകെ ഞാന്‍ പോകാറില്ലെന്നും നമ്മുക്ക് വേണ്ടത് അര്‍ത്ഥവത്തായ സംവാദങ്ങളാണെന്നും സ്വതന്ത്രവും സഭ്യവുമായ അഭിപ്രായ സ്വാതന്ത്ര്യത്തിന് വേണ്ടിയാണ് നമ്മളെല്ലാം നിലകൊള്ളേണ്ടതെന്നും മമ്മൂട്ടി പറഞ്ഞു.

അഭിമുഖം ഇങ്ങനെ:

നടി പാര്‍വതിയുടെ കസബയെ കുറിച്ചുളള പരമാര്‍ശവും വിവാദവും ശ്രദ്ധയില്‍പെട്ടിരുന്നില്ലേ. എന്താണ് താങ്കള്‍ നിശബ്ദത പാലിച്ചത്

പാര്‍വതി തന്നെ ഇക്കാര്യം എനിക്ക് അന്ന് ടെക്സ്റ്റ് ചെയ്തിരുന്നു. ഇതൊന്നും സാരമാക്കേണ്ടതില്ലെന്നും നമ്മളെ പോലുളള ആള്‍ക്കാരെ ഇത്തരം വിവാദങ്ങളിലേക്ക് വലിച്ചിഴക്കുന്നത് ഒരു രീതിയാണെന്നും പറഞ്ഞ് ഞാന്‍ പാര്‍വതിയെ അന്ന് തന്നെ ആശ്വസിപ്പിച്ചിരുന്നു. എന്നാല്‍ പിന്നീട് വിദേശയാത്രകളിലും മറ്റു തിരക്കുകളിലും ആയതു കൊണ്ട് പല കാര്യങ്ങളും ശ്രദ്ധയില്‍ പെട്ടില്ല.

ഒരു കലാ സൃഷ്ടിയെ കുറിച്ചുളള അഭിപ്രായപ്രകടനത്തിന് സ്വാതന്ത്യം ഉണ്ടോ എന്നതാണ് ഇപ്പോഴത്തെ വിവാദം

വിവാദത്തിന്റെ പുറകെ ഞാന്‍ പോകാറില്ല. നമ്മുക്ക് വേണ്ടത് അര്‍ത്ഥവത്തായ സംവാദങ്ങളാണ്. സ്വതന്ത്രവും സഭ്യവുമായ അഭിപ്രായ സ്വാതന്ത്ര്യത്തിന് വേണ്ടിയാണ് നമ്മളെല്ലാം നിലകൊള്ളേണ്ടത്.

താങ്കളുടെ ഫാന്‍സുകള്‍ വഴിവിട്ടു പ്രതികരിക്കുന്നു എന്നുളള ആക്ഷേപത്തെ കുറിച്ച് എന്തു പറയുന്നു

എനിക്കു വേണ്ടി പ്രതികരിക്കാനോ എന്നെ പ്രതിരോധിക്കാനോ ഞാന്‍ ആരേയും ഇന്നേ വരെ ചുമതലപ്പെടുത്തിയിട്ടില്ല. ആവിഷ്‌കാര സ്വാതന്ത്ര്യം പോലെ തന്നെ പ്രധാനപ്പെട്ടതാണ് അഭിപ്രായ സ്വാതന്ത്യവും.