‘ആക്രമിക്കപ്പെട്ട നടിയെ സഹായിച്ചില്ല’;ഡബ്ല്യുസിസിക്കെതിരെ നടന്‍ സിദ്ധീഖ്

‘ആക്രമിക്കപ്പെട്ട നടിയെ സഹായിച്ചില്ല’;ഡബ്ല്യുസിസിക്കെതിരെ നടന്‍ സിദ്ധീഖ്

ആലുവ: സിനിമയിലെ നടികളുടെ സംഘടനയായ ഡബ്ല്യുസിസിക്കെതിരെ വിമര്‍ശനവുമായി നടന്‍ സിദ്ധിഖ്. നടി ആക്രമിക്കപ്പെട്ട സംഭവത്തില്‍ നടിക്ക് വേണ്ടി ഡബ്ല്യുസിസി ഒന്നും ചെയ്തില്ലെന്ന് സിദ്ധീഖ് പറഞ്ഞു. റൂറല്‍ ജില്ലാ പോലീസും കേരള പോലീസ് അസോസിയേഷന്‍ റൂറല്‍ ജില്ലാ കമ്മിറ്റിയും ചേര്‍ന്നു സംഘടിപ്പിച്ച ‘ടോക് ഷോ’യില്‍ സംസാരിക്കുമ്പോഴായിരുന്നു സിദ്ധീഖ്.

ആക്രമിക്കപ്പെട്ട നടിക്കു വേണ്ടി വനിതാ താരങ്ങളുടെ സംഘടനയായ ഡബ്ല്യുസിസി ഒന്നും ചെയ്തില്ലെന്നാണ് സിദ്ധിഖിന്റെ വിമര്‍ശനം. സമൂഹമാധ്യമങ്ങില്‍ തോന്നിയതൊക്കെ എഴുതി വിടുക മാത്രമാണ് അവര്‍ ചെയ്തത്. നടി ആക്രമിക്കപ്പെട്ടതറിഞ്ഞ ഉടന്‍ താരസംഘടനയായ എഎംഎംഎയുടെ ഭാരവാഹികള്‍ മുഖ്യമന്ത്രിയെയും ഡിജിപിയെയും കണ്ടുവെന്നും സിദ്ധിഖ് പറഞ്ഞു.

3 ദിവസത്തിനുള്ളില്‍ പ്രതി പള്‍സര്‍ സുനിയെ പിടികൂടി. 85 ദിവസം ജയിലില്‍ കിടന്ന നടനെതിരെ മാസങ്ങള്‍ക്കു ശേഷമാണ് അയാള്‍ ആരോപണം ഉന്നയിച്ചതെന്നും സിദ്ധിഖ് പറയുന്നു. ലഹരിമരുന്ന് മാഫിയയ്‌ക്കെതിരെ പോലീസുമായി കൈകോര്‍ത്തു പോരാടാന്‍ തയാറാണെന്നും താരം തുറന്ന് പറഞ്ഞു.

നടി ആക്രമിക്കപ്പെട്ട സംഭവത്തിന്റെ പശ്ചാത്തലത്തിലാണ് ഡബ്ല്യുസിസി രൂപപ്പെട്ടത്. സംഭവത്തില്‍ പ്രതിയായ ദിലീപിനെ സംരക്ഷിക്കാന്‍ അമ്മ തയ്യാറായ സാഹചര്യത്തിലാണ് നാലു നടിമാര്‍ അമ്മയില്‍ നിന്നും അംഗത്വം രാജി വെച്ചത്.

NO COMMENTS

LEAVE A REPLY