ലോക്‌സഭാ; കോണ്‍ഗ്രസിന്റെ രണ്ടാം ഘട്ട സ്ഥാനാര്‍ഥി പട്ടിക പുറത്തിറക്കി

ലോക്‌സഭാ തെരഞ്ഞെടുപ്പിനുള്ള കോണ്‍ഗ്രസിന്റെ രണ്ടാം ഘട്ട സ്ഥാനാര്‍ഥി പട്ടിക പുറത്തിറക്കി. രണ്ടാം ഘട്ടത്തില്‍ ഉത്തര്‍പ്രദേശിലെ 16 സീറ്റുകളിലേയ്ക്കും മഹാരാഷ്ട്രയിലെ അഞ്ച് സീറ്റുകളിലേയ്ക്കുമുള്ള സ്ഥാനാര്‍ഥികളുടെ പട്ടികയാണ് കോണ്‍ഗ്രസ് പുറത്തുവിട്ടത്.

ഉത്തര്‍പ്രദേശിലെ 11 മണ്ഡലങ്ങളിലെ സ്ഥാനാര്‍ഥികളുടെ പട്ടിക നേരത്തെ കോണ്‍ഗ്രസ് പുറത്തുവിട്ടിരുന്നു. മുന്‍ മന്ത്രി സുശീല്‍ കുമാര്‍ ഷിന്‍ഡെ സോലാപുരില്‍നിന്നും മുതിര്‍ന്ന നേതാവും പി.സി.സി അധ്യക്ഷനുമായ രാജ് ബബ്ബര്‍ മൊറാദാബാദില്‍നിന്നും മത്സരിക്കും. നടന്‍ സുനില്‍ ദത്തിന്റെ മകള്‍ പ്രിയ ദത്ത് മുംബൈ നോര്‍ത്ത് സെന്‍ട്രലിലും ജനവിധി തേടും.

മിലിന്ദ് ദിയോറ, ശ്രീപ്രകാശ് ജെയ്‌സ്വാള്‍, സാവിത്രി ഫൂലെ എന്നിവരും സ്ഥാനാര്‍ഥി പട്ടികയിലുണ്ട്. രണ്ടാം ഘട്ട പട്ടിക കൂടി പുറത്തുവന്നതോടെ ഉത്തര്‍പ്രദേശിലെ 80 സീറ്റിലും കോണ്‍ഗ്രസ് മത്സരിക്കുമെന്ന് ഉറപ്പായി. വരും ദിവസങ്ങളില്‍ കൂടുതല്‍ സംസ്ഥാനങ്ങളിലെ സ്ഥാനാര്‍ഥികളുടെ പ്രഖ്യാപനം ഉണ്ടാകും.