കോവിഡ് നിരീക്ഷണത്തിലുള്ള കോഴിക്കോട് സ്വദേശി മരിച്ചു


കണ്ണൂര്‍: കൊവിഡ് നിരീക്ഷണത്തിലിരുന്നയാള്‍ മരിച്ചു. അതീവ ഗുരുതരാവസ്ഥയില്‍ ആശുപത്രിയിലാക്കിയ ഇയാള്‍ വിദേശത്ത് നിന്നെത്തി ക്വാറന്റീനില്‍ കഴിയുകയായിരുന്നുവെന്ന കാര്യം ബന്ധുക്കള്‍ ആശുപത്രി അധികൃതരോട് പറഞ്ഞില്ല. ഇതേ തുടര്‍ന്ന് ഡോക്ടര്‍മാരും നഴ്‌സുമാരുമടക്കം നിരവധി പേരെ ക്വാറന്റീനില്‍ പ്രവേശിപ്പിച്ചു. എന്നാല്‍ ഇയാളുടെ പരിശോധനാ ഫലം നെഗറ്റീവായതോടെ ആശങ്കയൊഴിഞ്ഞു.

കോഴിക്കോട് അഴിയൂര്‍ സ്വദേശിയായ 62കാരനാണ് തലശ്ശേരി സഹകരണ ആശുപത്രിയില്‍ വച്ച് മരിച്ചത്. വീട്ടില്‍ നിരീക്ഷണത്തിലിരിക്കെ കുഴഞ്ഞുവീണ ഇയാളെ ആദ്യം മാഹി ജനറല്‍ ആശുപത്രിയിലേക്ക് കൊണ്ടുപോയി. ഇവിടെ നിന്ന് തലശേരി സഹകരണ ആശുപത്രിയിലേക്ക് മാറ്റുകയായിരുന്നു. ഗുരുതരമായ വീഴ്ചയാണ് സംഭവിച്ചത്.

കൊവിഡ് നിരീക്ഷണത്തിലുള്ള ആളായിരുന്നു എന്ന് ബന്ധുക്കള്‍ ആദ്യം ആശുപത്രിയില്‍ പറഞ്ഞില്ല. ആരോഗ്യവകുപ്പ് അധികൃതരെ അറിയിക്കാതെയാണ് ഇയാളെ ആശുപത്രിയിലേക്ക് കൊണ്ടുപോയത്. നിരീക്ഷണത്തിലിരുന്നയാളാണ് എന്ന് മനസിലായതോടെ മരിച്ചയാളുടെ സ്രവം പരിശോധനയ്ക്ക് അയച്ചു. മൃതദേഹം തലശേരി ജനറല്‍ ആശുപത്രി മോര്‍ച്ചറിയിലേക്ക് മാറ്റി. ഇയാളുമായി അടുത്തിടപഴകിയ ഡോക്ടര്‍മാരും നഴ്സുമാരുമടക്കം എല്ലാവരെയും ക്വാറന്റീനില്‍ പ്രവേശിപ്പിക്കുകയും ചെയ്തിരുന്നു. ഈ മാസം 17 നാണ് ഇയാള്‍ ഭാര്യയോടൊപ്പം ഷാര്‍ജയില്‍ നിന്ന് നാട്ടിലെത്തിയത്.

SHARE