മുക്കത്ത് റോഡരികില്‍ അറുത്തിട്ട നിലയില്‍ മൃതദേഹം; പുരുഷ ജഡം തലയും, കൈകാലുകളും വെട്ടി മാറ്റിയ നിലയില്‍

മുക്കം : കാരശ്ശേരി പഞ്ചായത്തിലെ ഗേറ്റുംപടി-തൊണ്ടിമ്മല്‍ റോഡില്‍ തലയും , കയ്യും , കാലും , ഇല്ലാത്ത മനുഷ്യന്റെ മൃതദേഹം തള്ളി. ഒരാഴ്ച മുമ്പാണ് രണ്ട് ചാക്കുകള്‍ റോഡിരികില്‍ തള്ളിയത്.
ഒന്നില്‍ നിറയെ അറവ് മാലിന്യങ്ങളായിരുന്നു.രണ്ടാമത്തെ ചാക്ക് കഴിഞ്ഞ ദിവസം തെരുവുനായ്ക്കള്‍ കടിച്ചുകീറി റോഡിലിട്ടപ്പോഴാണ് ജഡം നാട്ടുകാര്‍ കണ്ടത്.ഇതിന്റെ കൈകാലുകളും തലയും വെട്ടിമാറ്റിയ നിലയിലാണ്. മൃതദേഹം ആരുടേതെന്ന് വ്യക്തമല്ല. മുക്കം പോലീസ് സ്ഥലത്തെത്തി പരിശോധന തുടരുകയാണ്.
എസ്റ്റേറ്റിന് നടുവിലൂടെയുള്ള റോഡ് മാലിന്യങ്ങള്‍ തള്ളുന്ന സ്ഥലമായി മാറിയിട്ടുണ്ട്.കോഴിക്കടകളില്‍ നിന്നും കശാപ്പ് കേന്ദ്രങ്ങളില്‍ നിന്നുമുള്ള അവശിഷ്ടങ്ങളാണ് ഏറെയും ഇവിടെ കൊണ്ടുവന്നിടുന്നത്. അതിനിടക്ക് ആരുടേയും ശ്രദ്ധയില്‍ പെടാനിരിക്കാനായിരിക്കണം മാലിന്യത്തിനൊപ്പം മനുഷ്യ ജഡവും തള്ളിയത്.റോഡരികില്‍ മാലിന്യം തള്ളല്‍ പതിവായതോടെ തെരുവ് നായ്ക്കളും ഇവിടെ പെറ്റുപെരുകുകയാണ്.
കാരശ്ശേരി, തിരുവമ്പാടി പഞ്ചായത്തുകളിലൂടെയാണ് റോഡ് കടന്നുപോകുന്നത്.കാരശ്ശേരി പഞ്ചായത്തിന്റെ ഭാഗത്താണ് മാലിന്യം തള്ളുന്നതെങ്കിലും ഇതിന്റെ ദൂഷ്യഫലങ്ങള്‍ അനുഭവിക്കേണ്ടി വരുന്നത് തിരുവമ്പാടി പഞ്ചായത്തിലെ ഇരുന്നക്കുഴി, തൊണ്ടിമ്മല്‍ ഭാഗത്തുള്ളവരാണ്.

SHARE