Culture

ഡിസംബര്‍ 30ന് ശേഷം എന്ത് സംഭവിക്കും?

Published

7 years ago

December 29, 2016

രാജ്യത്തെ 85ശതമാനം കറന്‍സി പിന്‍വലിച്ചുള്ള തീരുമാനം കഴിഞ്ഞ നവംബര്‍ എട്ടിനാണ് പ്രധാനമന്ത്രി നരേന്ദ്രമോദി രാജ്യത്തെ അറിയിക്കുന്നത്. മുന്‍കരുതലുകളില്ലാതെ പെട്ടെന്ന് കൈക്കൊണ്ട തീരുമാനം രാജ്യത്തെ സാധാരണക്കാര്‍ക്ക് മൊത്തത്തില്‍ കിട്ടിയ ഒരു അടിയായി മാറുകയായിരുന്നു. ഗ്രാമങ്ങളിലും നഗരങ്ങളിലുമുള്‍പ്പെടെ നോട്ട് പ്രതിസന്ധി അരക്ഷിതാവസ്ഥ സൃഷ്ടിച്ചു. ബാങ്കുകള്‍ക്കു മുന്നില്‍ മണിക്കൂറുകളോളം വരി നിന്ന് പലരും മരണത്തിലേക്ക് വഴുതി വീണു. നോട്ടില്ലായ്മ രാജ്യത്തെ സാധാരണക്കാരെ വലച്ചപ്പോള്‍ പ്രധാനമന്ത്രി പ്രശ്‌നപരിഹാരത്തിന് 50 ദിവസം വേണമെന്ന് ആവശ്യപ്പെടുകയായിരുന്നു. ഒരു രാജ്യം മുഴുവന്‍ ഞെട്ടിവിറച്ച് വേദനിച്ച അരക്ഷിതാവസ്ഥയ്ക്ക് പരിഹാരമുണ്ടാക്കാമെന്ന് പറഞ്ഞ ആ സമയം എത്തിയിരിക്കുകയാണ്. നാളെ 50ദിവസം പൂര്‍ത്തിയാകുമ്പോള്‍ എന്തു പരിഹാരമാണ് ജനങ്ങള്‍ക്കുമുന്നില്‍ മോദി നല്‍കുന്നതെന്ന് ഉറ്റുനോക്കുകയാണ് രാജ്യം.

രാജ്യത്തെ അഭിസംബോധന ചെയ്ത് വലിയൊരു തീരുമാനം പ്രഖ്യാപിച്ച മോദി പാര്‍ലമെന്റ് സമ്മേളനത്തില്‍ പങ്കെടുക്കാതെ ഒളിച്ചോടുകയായിരുന്നു. പ്രതിപക്ഷം ഒറ്റക്കെട്ടായി നോട്ട് പിന്‍വലിക്കലിനെ എതിര്‍ത്ത് സഭകളില്‍ പ്രത്യക്ഷപ്പെട്ടു. മുന്‍ പ്രധാനമന്ത്രിയും സാമ്പത്തിക വിദഗ്ധനുമായ മന്‍മോഹന്‍സിങ് മോദിയുടെ നീക്കത്തെ ചരിത്രത്തിലെ ഏറ്റവും വലിയ മണ്ടത്തരമെന്നാണ് വിശേഷിപ്പിച്ചത്. പണം പിന്‍വലിക്കല്‍ പദ്ധതിക്ക് രൂപം നല്‍കിയവരും ഉപദേശം നല്‍കിയവരും നോട്ട് പ്രതിസന്ധിയില്‍ മോദിയെ വിമര്‍ശിച്ചു. വേണ്ടത്ര മുന്‍കരുതലില്ലാതെ നടത്തിയ തീരുമാനത്തിന് വിമര്‍ശനവുമായി സാമ്പത്തിക വിദഗ്ധരും രംഗത്തെത്തി. രാജ്യത്തെ ആഭ്യന്തര വളര്‍ച്ചയില്‍ രണ്ടു ശതമാനത്തോളം കുറവുണ്ടാകുമെന്ന് സാമ്പത്തിക വിദഗ്ധര്‍ ചൂണ്ടിക്കാണിക്കുന്നു.

രാജ്യത്തെ 85ശതമാനത്തോളം കറന്‍സി പിന്‍വലിച്ചത് കള്ളപ്പണം തടയാനെന്നായിരുന്നു മോദിയുടെ വാദം. എന്നാല്‍ കുറച്ചുദിവസങ്ങള്‍ക്കകം വാദം പൊളിയുകയായിരുന്നു. രാജ്യത്തെ കാഷ്‌ലെസ് ഇക്കോണമിയിലേക്കുള്ള പരിവര്‍ത്തനത്തിനായിരുന്നു നോട്ട് പിന്‍വലിക്കലെന്ന് സര്‍ക്കാര്‍ പറഞ്ഞുവെച്ചു. രാജ്യത്തെ 95ശതമാനം ആളുകള്‍ക്കും ഇന്റര്‍നെറ്റ് സൗകര്യമില്ല. ബീഹാറുള്‍പ്പെടെയുള്ള മറ്റു സംസ്ഥാനങ്ങളില്‍ ഇപ്പോഴും ലഭ്യമാകുന്ന വൈദ്യുതി 15ശതമാനത്തിലും താഴെയാണ്. വേനല്‍ക്കാലത്ത് മണിക്കൂറുകളോളമാണ് പവര്‍കട്ടുണ്ടാവുന്നത്. മഴ വന്നാലോ കാറ്റ് വീശിയാലോ ഇല്ലാതുന്ന വൈദ്യുതി ബന്ധം. ഇതൊക്കെ നിലനില്‍ക്കുമ്പോഴാണ് നിരക്ഷരരായ ജനതക്കു മുന്നില്‍ രാജ്യത്തിന്റെ പ്രധാനമന്ത്രി ഡിജിറ്റല്‍ കാഷ് ഇക്കോണമി അവതരിപ്പിക്കുന്നതെന്നാണ് ഞെട്ടിപ്പിക്കുന്ന വസ്തുത. എന്നാല്‍ 50ദിവസം കൊണ്ട് തീര്‍ക്കാന്‍ കവിയുന്നതല്ല നോട്ട് പ്രതിസന്ധിയെന്നും ആറുമാസത്തോളം നിലനില്‍ക്കുന്നതാണ് പ്രശ്‌നമെന്നും വിദഗ്ധര്‍ പറയുന്നു.

കറന്‍സി പിന്‍വലിച്ച് മുന്നോട്ട് പോകുമ്പോഴും കറന്‍സി രഹിത സമ്പദ് വ്യവസ്ഥയെന്ന് ഘോരഘോരം പ്രസംഗിക്കുമ്പോഴും പിന്‍വലിച്ച കറന്‍സിയുടെ 90ശതമാനത്തോളം പുതിയ നോട്ടുകള്‍ ബാങ്കിലെത്തിയെന്നതാണ് മറ്റൊരു വസ്തുത. പണം പിന്‍വലിക്കുന്നതിന് ഏര്‍പ്പെടുത്തിയ നിയന്ത്രണങ്ങള്‍ പെട്ടെന്ന് ഇല്ലാതാകുമ്പോള്‍ അത് ബാങ്കുകളുടെ നിലനില്‍പ്പിന് വിഘാതമാകുമെന്ന് കാണിച്ച് ബാങ്കുകള്‍ രംഗത്തുണ്ട്. എന്തൊക്കെയാണെങ്കിലും പണം പിന്‍വലിച്ചതുള്‍പ്പെടെയുള്ള നടപടികളുമായി മുന്നോട്ട് പോകുമെന്ന് തന്നെയാണ് കഴിഞ്ഞ ദിവസങ്ങളിലായി മോദി നടത്തിയ പ്രസംഗങ്ങളില്‍ നിന്നും വ്യക്തമാകുന്നത്. 50 ദിവസം പൂര്‍ത്തിയാക്കിയ അവസരത്തില്‍ പുതുവല്‍സതരത്തലേന്ന് മോദി രാജ്യത്തെ അഭിസംബോധന ചെയ്യാന്‍ പ്രത്യക്ഷപ്പെടുമ്പോള്‍ എന്ത് പരിഹാരമാണ്, അല്ലെങ്കില്‍ എന്താണ് രാജ്യത്തോട് പറയാന്‍ പ്രധാനമന്ത്രിക്കുള്ളത്? രാജ്യത്തെ ഓരോ മനുഷ്യനും കാതുകൂര്‍പ്പിച്ചിരിക്കുന്നത് അത് കേള്‍ക്കാനാണ്.

Film

അടിമുടി ഞെട്ടിക്കാൻ ‘പെരുമാനി’യിലെ കൂട്ടർ എത്തുന്നു ! ടീസർ ദുൽഖർ സൽമാൻ പുറത്തിറക്കി…

പ്രേക്ഷകരെ അടിമുടി ഞെട്ടിക്കാൻ ‘പെരുമാനി’യിലെ കൂട്ടർ മെയ് മാസത്തിൽ തിയറ്ററുകളിലെത്തും.

Published

3 days ago

April 22, 2024

webdesk13

സണ്ണി വെയ്ൻ, വിനയ് ഫോർട്ട്‌, ലുക്ക്‌മാൻ അവറാൻ എന്നിവരെ കേന്ദ്ര കഥാപാത്രങ്ങളാക്കി ‘അപ്പൻ’ ശേഷം മജു സംവിധാനം ചെയ്യുന്ന ‘പെരുമാനി’യുടെ ടീസർ പുറത്തുവിട്ടു. ‘പെരുമാനി’ എന്ന ഗ്രാമം, ഒന്നു പറഞ്ഞാ രണ്ടാമത്തതിന് ഒടിപ്പടച്ചെത്തുന്ന ഗ്രാമവാസികൾ, ഇനി കലഹത്തിനും പ്രശ്നങ്ങൾക്കുമാണെങ്കിലോ യാതൊരു കുറവൂല്ലാ, തനി നാടൻ മട്ടിൽ കളർഫുളായെത്തിയ ടീസർ പ്രേക്ഷകശ്രദ്ധ നേടുന്നു. ദുൽഖർ സൽമാനാണ് ടീസർ റിലീസ് ചെയ്തത്. പ്രേക്ഷകരെ അടിമുടി ഞെട്ടിക്കാൻ ‘പെരുമാനി’യിലെ കൂട്ടർ മെയ് മാസത്തിൽ തിയറ്ററുകളിലെത്തും.

2022 ഒക്ടോബർ 28ന് റിലീസ് ചെയ്ത സണ്ണി വെയ്ൻ-അലൻസിയർ ചിത്രം ‘അപ്പൻ’ന് ശേഷം മജു സംവിധാനം ചെയ്യുന്ന സിനിമയാണ് ‘പെരുമാനി’. ചിത്രത്തിൽ വിനയ് ഫോർട്ട്‌ അവതരിപ്പിക്കുന്ന കഥാപാത്രത്തിന്റെ വ്യത്യസ്തമായ ഗെറ്റപ്പ് സോഷ്യൽ മീഡിയകളിൽ വലിയ രീതിയിൽ വൈറലായിരുന്നു. അടുത്തിടെ പുറത്തുവിട്ട ചിത്രത്തിന്റെ മോഷൻ പോസ്റ്റർ കണ്ടതോടെ വലിയ പ്രത്യേകതയോടെ എത്തുന്ന സിനിമയാണ് ‘പെരുമാനി’ എന്ന നിഗമനത്തിലാണ് പ്രേക്ഷകർ എത്തിചേർന്നത്. അത് ശരിവെക്കുന്ന വിധത്തിലാണ് ടീസറും.

‘പെരുമാനി’ എന്ന ഗ്രാമവും അവിടുത്തെ മനുഷ്യരും അവർ അഭിമുഖീകരിക്കുന്ന സംഭവവികാസങ്ങളും ഇതിവൃത്തമാക്കിയ ഈ ചിത്രം ഒരു ഫാന്റസി ഡ്രാമയാണ്. സംവിധായകൻ മജു തന്നെയാണ് തിരക്കഥ രചിച്ചത്. യൂൻ വി മൂവീസും മജു മൂവീസും ചേർന്നാണ് അവതരിപ്പിക്കുന്ന ചിത്രത്തിന്റെ ഡിസ്ട്രിബ്യൂഷൻ സെഞ്ച്വറി ഫിലിംസാണ് സ്വന്തമാക്കിയിരിക്കുന്നത്. ഫിറോസ് തൈരിനിലാണ് നിർമ്മാതാവ്. ദീപ തോമസ്, രാധിക രാധാകൃഷ്ണൻ, നവാസ് വള്ളിക്കുന്ന്, വിജിലേഷ്, ഫ്രാങ്കോ തുടങ്ങിയവരാണ് ചിത്രത്തിലെ മറ്റ് അഭിനേതാക്കൾ.

എക്സിക്യൂട്ടീവ് പ്രൊഡ്യുസേർസ്: സഞ്ജീവ് മേനോൻ, ശ്യാംധർ, ഛായാഗ്രഹണം: മനേഷ് മാധവൻ, ചിത്രസംയോജനം: ജോയൽ കവി, സംഗീതം: ഗോപി സുന്ദർ, സൗണ്ട് ഡിസൈൻ: ജയദേവൻ ചക്കാടത്ത്, സിങ്ക് സൗണ്ട്: വൈശാഖ് പി വി, ഗാനരചന: മുഹ്സിൻ പെരാരി, സുഹൈൽ കോയ, പ്രൊജക്ട് ഡിസൈനർ: ഷംസുദീൻ മങ്കരത്തൊടി, പ്രൊഡക്ഷൻ കൺട്രോളർ: ഗിരീഷ് അത്തോളി, ചീഫ് അസോസിയേറ്റ് ഡയറെക്ടർ: അനീഷ് ജോർജ്, അസോസിയേറ്റ് ഡയറക്ടേർസ്: ഷിന്റോ വടക്കേക്കര, അഭിലാഷ് ഇല്ലിക്കുളം, പ്രൊഡക്ഷൻ എക്സിക്യൂട്ടീവ്: ഹാരിസ് റഹ്മാൻ, പ്രൊജക്റ്റ്‌ കോർഡിനേറ്റർ: അനൂപ് കൃഷ്ണ, ഫിനാൻസ് കൺട്രോളർ: വിജീഷ് രവി, കലാസംവിധാനം: വിശ്വനാഥൻ അരവിന്ദ്, വസ്ത്രാലങ്കാരം: ഇർഷാദ് ചെറുകുന്ന്, മേക്കപ്പ്: ലാലു കൂട്ടലിട, വി.എഫ്.എക്സ്: സജി ജൂനിയർ എഫ് എക്സ്, കളറിസ്റ്റ്: രമേശ്‌ അയ്യർ, ആക്ഷൻ: മാഫിയ ശശി, സ്റ്റിൽസ്: സെറീൻ ബാബു, പോസ്റ്റർ ഡിസൈൻ: യെല്ലോ ടൂത്ത്,ഡിസ്ട്രിബൂഷൻ – സെഞ്ചുറി ഫിലിംസ്, പിആർഒ & മാർക്കറ്റിംഗ്: വൈശാഖ് വടക്കേവീട്, ജിനു അനിൽകുമാർ.

Film

മരുഭൂമിയിൽ പെയ്ത ദുരിതമഴയിൽ നിന്ന് ഗൾഫ് ജനത കരകയറട്ടെ, ആശ്വാസവാക്കുകളുമായി മമ്മൂട്ടിയും ടോവിനോയും

ഈ ദുരിതത്തില്‍ നിന്ന് ദുബൈയിലെ ജനങ്ങള്‍ എത്രയും വേഗം കരകയറട്ടെ എന്ന ആശ്വാസ വാക്കുകളുമായെത്തിയിരിക്കുകയാണ് മോളിവുഡിലെ പ്രമുഖരായ താരങ്ങള്‍.

Published

7 days ago

April 18, 2024

webdesk13

കഴിഞ്ഞ ദിവസങ്ങളില്‍ ദുബൈയില്‍ പെയ്ത കനത്ത മഴയില്‍ പ്രധാന നഗരങ്ങളും ഹൈവേകളും വിമാനത്താവളങ്ങളും വെള്ളത്തിനടിയിലായിരുന്നു. കഴിഞ്ഞ ഏഴുദശകത്തിനിടയില്‍ പ്രദേശത്ത് പെയ്ത ഏറ്റവും വലിയ മഴയായിരുന്നു ഇത്. ഈ ദുരിതത്തില്‍ നിന്ന് ദുബൈയിലെ ജനങ്ങള്‍ എത്രയും വേഗം കരകയറട്ടെ എന്ന ആശ്വാസ വാക്കുകളുമായെത്തിയിരിക്കുകയാണ് മോളിവുഡിലെ പ്രമുഖരായ താരങ്ങള്‍.

‘ഗള്‍ഫ് നാടുകളിലെ പ്രകൃതിക്ഷോഭം അവിടെയുള്ള സകലമാന ജീവിതങ്ങളെയും ദുരിതത്തില്‍ ആഴ്ത്തിയിരിക്കുന്നു എന്നത് വേദനയോടെ അറിയുന്നു. ആശങ്കകള്‍ മനസിലാക്കുന്നു. പരമാവധി സുരക്ഷിതരായിരിക്കുക. എല്ലാം എത്രയും പെട്ടന്ന് ശരിയാകട്ടെ എന്നാണ് മമ്മൂട്ടി പറയുന്നത്.

‘മരുഭൂമിയില്‍ സ്വപ്നനഗരിയില്‍ പടുത്തുയര്‍ത്തിയ അതേ ആര്‍ജ്ജവത്തോടെ ഈ ദുരിതപെയ്തിയില്‍ നിന്നും എത്രയും പെട്ടന്ന് സാധാരണ ജീവിതത്തിലേക്ക് തിരിച്ചെത്തുവാന്‍ നമ്മുടെ സഹോദരര്‍ ഉള്‍പ്പടെയുള്ള ഗള്‍ഫ് ജനതയ്ക്ക് സാധിക്കട്ടെ’ എന്നാണ് ടോവിനോ തോമസ് കുറിച്ചത്. നിരവധിപേര്‍ ദുബൈയി ജനതയ്ക്ക് പിന്തുണ അറിയിച്ചിട്ടുണ്ട്.

Film

തർക്കം പരിഹരിച്ചു; പിവിആറിൽ മലയാള സിനിമകൾ പ്രദർശിപ്പിക്കും

നാളെ മുതൽ പിവിആർ സിനിമാസിൽ മലയാളം സിനിമകൾ പ്രദർശിപ്പിക്കും.

Published

2 weeks ago

April 13, 2024

webdesk13

പിവിആർ സിനിമാസും – പ്രൊഡ്യൂസേഴ്സ് അസോസിയേഷനുമായുള്ള തർക്കം പരിഹരിച്ചു. നാളെ മുതൽ പിവിആർ സിനിമാസിൽ മലയാളം സിനിമകൾ പ്രദർശിപ്പിക്കും.വ്യവസായി എം എ യുസഫ് അലിയുടെ മാധ്യസ്ഥതയിൽ ഫെഫ്ക്കയും പിവിആർ അധികൃതരും നടത്തി ചർച്ചയിലാണ് തീരുമാനം.

പിവിആർ തീരുമാനം പിൻവലിച്ചില്ലെങ്കിൽ ഭാവിയിൽ മൊഴിമാറ്റ ചിത്രങ്ങൾ അടക്കം പ്രദർശിപ്പിക്കാൻ അനുമതി നൽകില്ലെന്ന് സാങ്കേതിക ഫെഫ്ക നിലപാട് എടുത്തിരുന്നു. ഇതിന് പിന്നാലെയാണ് തിരുമാനത്തിൽ നിന്നും പിവിആർ അധികൃതർ പിന്മാറിയത്.

പിവിആര്‍ കയ്യൂക്ക് കാണിക്കുകയാണെന്നും പ്രദര്‍ശനം നിര്‍ത്തിവച്ച ദിവസങ്ങളിലെ നഷ്ടപരിഹാരം നല്‍കാതെ പ്രസ്തുത മള്‍ട്ടിപ്ലെക്സ് ശൃംഖലയ്ക്ക് ഇനി മലയാള സിനിമകള്‍ നല്‍കില്ലെന്നും ഫെഫ്ക അറിയിച്ചിരുന്നു. പരിഹാരം ഉണ്ടായില്ലെങ്കിൽ പ്രതിഷേധം പിവിആർ സ്ക്രീനുകളിലേക്ക് വ്യാപിപ്പിക്കും. പിവിആറിന്‍റെ നീക്കം പുതിയ സിനിമകള്‍ക്ക് വലിയ തിരിച്ചടിയാണെന്നും ഫെഫ്ക അറിയിച്ചിരുന്നു.

പിവിആറും നിർമാതാക്കളും തമ്മിലുള്ള ഡിജിറ്റൽ കണ്ടന്റ് പ്രൊഡക്ഷൻ സംബന്ധിച്ച തർക്കമാണ് സിനിമകളുടെ പ്രദർശനം നിർത്തിവെക്കുന്നതിലേക്ക് എത്തിയത്. വൻതുക നൽകുന്നത് ഒഴിവാക്കാൻ നിർമാതാക്കൾ സ്വന്തമായി ഇതിനുള്ള സംവിധാനം ഒരുക്കിയത് അ‌ംഗീകരിക്കാൻ തയ്യാറല്ലാത്തതാണ് തർക്കത്തിന് കാരണം.