ശബരിമല എല്ലാവരുടേതുമെന്ന് ഹൈക്കോടതി

കൊച്ചി: ശബരിമലയുടെ പാരമ്പര്യം എല്ലാ മതസ്ഥര്‍ക്കും അവകാശപ്പെട്ടതാണെന്നും ഇരുമുടിക്കെട്ടില്ലാതെയും ശബരിമലക്ക് പോകാമെന്നും ഹൈക്കോടതി. വിശ്വാസികള്‍ക്ക് മാത്രമേ ക്ഷേത്രദര്‍ശനം അനുവദിക്കാവൂ എന്ന് ആവശ്യപ്പെട്ട് ബി.ജെ.പി. ഇന്റലക്ച്വല്‍ സെല്‍ സംസ്ഥാന കണ്‍വീനര്‍ ടി.ജി.മോഹന്‍ദാസ് സമര്‍പ്പിച്ച ഹര്‍ജിയിലാണ് കോടതിയുടെ ഉത്തരവ്.

ശബരിമല എല്ലാവരുടേയുമാണെന്ന് കോടതി പറഞ്ഞു. ഇരുമുടിക്കെട്ടില്ലാതെയും ശബരിമലക്ക് പോകാം. പതിനെട്ടാം പടിയിലൂടെ കയറാന്‍ മാത്രമേ ഇരുമുടിക്കെട്ട് ആവശ്യമുള്ളു. അല്ലാത്തവര്‍ക്ക് നേരെ എതിര്‍വശത്തുള്ള നടയിലൂടെ സന്നിധാനത്തേക്ക് കടക്കാവുന്നതാണ്. ശബരിമല ദര്‍ശനം സംബന്ധിച്ച് ഈ കീഴ് വഴക്കം നിലനിന്നു പോരുന്നതാണ്. സന്നിധാനം വാവര് സ്വാമിയുടെ ഹൃദയം ഇരിക്കുന്ന ഇടമാണെന്നും കോടതി പറഞ്ഞു.

അതേസമയം, ഹര്‍ജിയില്‍ കോടതി അതൃപ്തി പ്രകടിപ്പിക്കുകയും ചെയ്തു. ഹര്‍ജിയില്‍ സംസ്ഥാന സര്‍ക്കാരിന്റേയും ദേവസ്വം ബോര്‍ഡിന്റേയും വിശദീകരണം ആവശ്യപ്പെട്ട കോടതി കേസ് രണ്ടാഴ്ച്ചക്ക് ശേഷം പരിഗണിക്കാന്‍ മാറ്റിവെച്ചു.

SHARE