ജസ്‌നയുടെ തിരോധാനം : സുഹൃത്തിനെ നുണപരിശോധനക്ക് വിധേയമാക്കുമെന്ന് അന്വേഷണ സംഘം

പത്തനംതിട്ട: എരുമേലിയ്ക്ക് സമീപം മുക്കൂട്ടുതറയിലെ ജസ്‌ന മറിയം ജെയിംസിന്റെ തിരോധാന കേസില്‍ സുഹൃത്തിനെ നുണപരിശോധനക്ക് വിധേയമാക്കുമെന്ന് പത്തനംതിട്ട ജില്ലാ പൊലീസ് മേധാവി ടി നാരായണന്‍ അറിയിച്ചു. ജസ്‌നയെ കണ്ടെത്താനായി ലഭിക്കുന്ന എല്ലാ വിവരങ്ങളും പരിശോധിച്ചുവരികയാണെന്നും ആരെയും ചോദ്യം ചെയ്യലില്‍ നിന്ന് ഒഴിവാക്കിയിട്ടില്ലെന്നും അദ്ദേഹം പറഞ്ഞു.

ജസ്‌ന ഒരു സുഹൃത്തിന്റെ ഫോണിലേയ്ക്ക് ആയിരത്തിലേറെ തവണ വിളിച്ചിരുന്നതായി കണ്ടെത്തിയിട്ടുണ്ട്. ഈ സുഹൃത്തിനെയാണ് നുണപരിശോധനക്ക് വിധേയമാക്കുന്നത്. ഇതിനായി അന്വേഷണ സംഘം ശ്രമം തുടങ്ങിയിട്ടുണ്ട്. അതേസമയം അന്വേഷണവുമായി പൂര്‍ണമായും സഹകരിക്കുമെന്നും നാര്‍ക്കോ അനാലിസിസ് ഉള്‍പ്പെടെയുള്ള പരിശോധയ്ക്ക് തയ്യാറാണെന്നും ജസ്‌നയുടെ കുടുംബം പൊലീസിനെ അറിയിച്ചിട്ടുണ്ട്.

ജസ്‌നയെ കാണാതായ മൂന്നാം ദിവസം ചെന്നൈ അയനാപുരത്ത് കുട്ടിയെ കണ്ടതായുള്ള വെളിപ്പെടുത്തലിനെപ്പറ്റി അന്വേഷിക്കാന്‍ പൊലീസ് തീരുമാനിച്ചു. നേരത്തെ ചെന്നൈ അയനാപുരം വെള്ളല സ്ട്രീറ്റിലെ കടയില്‍ നിന്ന് ജസ്‌ന ഫോണ്‍ ചെയ്‌തെന്ന് കടയുടമയും സമീപവാസിയായ മലയാളിയും പൊലീസിനെ അറിയിച്ചിട്ടും അന്വേഷിച്ചില്ലെന്ന് ആരോപണമുയര്‍ന്നിരുന്നു.

 

SHARE