കര്‍ണാടകയില്‍ മുഴുവന്‍ വിമത എം.എല്‍.എ മാരെയും അയോഗ്യരാക്കി സ്പീക്കര്‍

കര്‍ണാടകയില്‍ 14 വിമത എം.എല്‍.എമാരെയും അയോഗ്യരാക്കി സ്പീക്കര്‍ കെ.ആര്‍ രമേശ്കുമാര്‍. 11 കോണ്‍ഗ്രസ് എം.എല്‍.എമാരെയും 3 ജെ.ഡി.എസ് എം.എല്‍.എമാരെയുമാണ് സ്പീക്കര്‍ പുറത്താക്കിയത്.

കര്‍ണാടകയില്‍ യെദിയൂരപ്പയുടെ നേതൃത്വത്തിലുള്ള ബി.ജെ.പി സര്‍ക്കാര്‍ അധികാരത്തില്‍ വന്നതോടെ നിലവിലെ സ്പീക്കര്‍ കെ.ആര്‍ രമേശ് കുമാറിനെ പുകച്ച് ചാടിക്കാന്‍ നീക്കം മുന്‍പ് തുടങ്ങിയിരുന്നു. സ്പീക്കര്‍ സ്വമേധയാ രാജിവെച്ചൊഴിഞ്ഞില്ലെങ്കില്‍ അദ്ദേഹത്തിനെതിരെ അവിശ്വാസ പ്രമേയം കൊണ്ടു വരാനാണ് സര്‍ക്കാര്‍ ആലോചിക്കുന്നത്. ഭരണ കക്ഷി അംഗമാണ് സ്പീക്കര്‍ ആകാറുള്ളതെന്നതിനാല്‍ രമേശ് കുമാറിനോട് സ്ഥാനത്തു നിന്നും രാജിവെക്കണമെന്ന് അറിയിച്ചതായി മുതിര്‍ന്ന ബി.ജെ.പി നേതാവ് വ്യക്തമാക്കി.

രമേശ് കുമാര്‍ സ്്പീക്കര്‍ സ്ഥാനം രാജിവെച്ചില്ലെങ്കില്‍ അദ്ദേഹത്തിനെതിരെ അവിശ്വാസ പ്രമേയം കൊണ്ടുവരും ബി.ജെ.പി എം.എല്‍.എ പറഞ്ഞു. തിങ്കളാഴ്ച സഭയില്‍ വിശ്വാസം തേടുന്നതും ധനകാര്യ ബില്‍ പാസാക്കി എടുക്കുന്നതുമാണ് ആദ്യ ലക്ഷ്യം. സ്പീക്കര്‍ രാജിവെക്കുമോ ഇല്ലയോ എന്ന് തങ്ങള്‍ നോക്കും. പ്രതിപക്ഷ പാര്‍ട്ടി അംഗത്തെ സ്പീക്കറായി അംഗീകരിക്കാനാവില്ലെന്നും ബി.ജെ.പി എം.എല്‍.എ വ്യക്തമാക്കി. സര്‍ക്കാര്‍ സഭയില്‍ വിശ്വാസം തേടിയാല്‍ അടുത്ത നടപടി സ്പീക്കര്‍ക്കെതിരായ അവിശ്വാസ പ്രമേയമായിരിക്കുമെന്നും അദ്ദേഹം കൂട്ടിച്ചേര്‍ത്തു. ഒരു സ്വതന്ത്രനേയും രണ്ട് കോണ്‍ഗ്രസ് വിമത എം.എല്‍.എമാരേയും സ്പീക്കര്‍ കഴിഞ്ഞ ദിവസം അയോഗ്യനാക്കിയതിന് പിന്നാലെയാണ് യെദിയൂരപ്പയുടെ നേതൃത്തില്‍ ബി.ജെ.പി സര്‍ക്കാര്‍ രൂപീകരിച്ചത്.

SHARE