20 തദ്ദേശ വാര്‍ഡുകളില്‍ ഉപതെരഞ്ഞെടുപ്പ് വിജ്ഞാപനം

തിരുവനന്തപുരം: പതിമൂന്ന് ജില്ലകളിലെ 19 തദ്ദേശ സ്വയംഭരണ വാര്‍ഡുകളില്‍ ഈമാസം 28നും തൃശൂര്‍ എളവള്ളി ഗ്രാമ പഞ്ചായത്തിലെ പറക്കാട് വാര്‍ഡില്‍ മാര്‍ച്ച് മൂന്നിനും ഉപതെരഞ്ഞെടുപ്പ് നടത്താന്‍ സംസ്ഥാന തെരഞ്ഞെടുപ്പു കമ്മീഷന്‍ വിജ്ഞാപനം പുറപ്പെടുവിച്ചു. തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, എറണാകുളം, തൃശൂര്‍, പാലക്കാട്, മലപ്പുറം, വയനാട്, കണ്ണൂര്‍ ജില്ലകളിലെ 17 ഗ്രാമപഞ്ചായത്ത് വാര്‍ഡുകളിലും കോഴിക്കോട് ഒരു നഗരസഭ‘ വാര്‍ഡിലും വയനാട്, കാസര്‍കോട് ജില്ലകളിലെ ഓരോ ബ്ലോക്ക്പഞ്ചായത്ത് വാര്‍ഡിലുമാണ് ഉപതെരഞ്ഞെടുപ്പ്.

മാതൃകാപെരുമാറ്റച്ചട്ടം ജനുവരി 30ന് നിലവില്‍ വന്നു. ഫെബ്രുവരി രണ്ടു മുതല്‍ നാമനിര്‍ദ്ദേശം സമര്‍പ്പിക്കാം. പത്രിക സമര്‍പ്പിക്കാനുള്ള അവസാന തീയതി ഒന്‍പത്. സൂക്ഷ്മ പരിശോധന 12ന് നടക്കും. സ്ഥാനാര്‍ത്ഥിത്വം പിന്‍വലിക്കാനുളള അവസാന തീയതി 14. 19 വാര്‍ഡുകളിലെ വോട്ടെടുപ്പ് ഫെബ്രുവരി 28 രാവിലെ ഏഴ് മണിക്ക് ആരംഭിച്ച് വൈകിട്ട് അഞ്ചിന് അവസാനിക്കും. മാര്‍ച്ച് ഒന്നിന് രാവിലെ 10 മണിക്ക് വോട്ടെണ്ണല്‍ ആരംഭിക്കും. മാര്‍ച്ച് മൂന്നിന് ഉപതെരഞ്ഞെടുപ്പ് നടക്കുന്ന പറക്കാട് വാര്‍ഡില്‍ അന്നുതന്നെ വോട്ടെണ്ണി ഫലം പ്രഖ്യാപിക്കും.

ഉപതെരഞ്ഞെടുപ്പു നടക്കുന്ന ജില്ല, ഗ്രാമപഞ്ചായത്ത്, വാര്‍ഡ് എന്ന ക്രമത്തില്‍. തിരുവനന്തപുരം: വിളപ്പില്‍- നൂലിയോട്, കൊല്ലം: ഉമ്മന്നൂര്‍- അണ്ടൂര്‍, നെടുമ്പന- പുലിയില, പത്തനംതിട്ട:”തണ്ണിത്തോട് – മണ്ണീറ, ചെറുകോല്‍-മഞ്ഞപ്രമല, ആലപ്പുഴ: എഴുപുന്ന- കുമാരപുരം, തകഴി- കളത്തില്‍പാലം, കോട്ടയം: മുത്തോലി-തെക്കുംമുറി നോര്‍ത്ത്, എറണാകുളം: രാമമംഗലം- നെട്ടൂപാടം, വടവുകോട്പുത്തന്‍കുരിശ്- കരിമുകള്‍ നോര്‍ത്ത്, തൃശൂര്‍: എളവള്ളി-പറയ്ക്കാട് , ചാഴൂര്‍- പഴുവില്‍നോര്‍ത്ത്, പാലക്കാട്: കുലുക്കല്ലൂര്‍- മപ്പാട്ടുകര വെസ്റ്റ്, മലപ്പുറം: തവന്നൂര്‍- കൂരട, വെട്ടം-കോട്ടേക്കാട,് വയനാട്: തിരുനെല്ലി-അപ്പപ്പാറ, കണ്ണൂര്‍: പേരാവൂര്‍-പേരാവൂര്‍.

കോഴിക്കോട് കൊടുവള്ളി നഗരസഭയിലെ തലപ്പെരുമണ്ണ വാര്‍ഡ്, വയനാട് ജില്ലയിലെ കല്‍പ്പറ്റ ബ്ലോക്ക് പഞ്ചായത്തില്‍ പടിഞ്ഞാറത്തറ വാര്‍ഡ്, കാസര്‍കോട് ജില്ലയിലെ കാഞ്ഞങ്ങാട് ബ്ലോക്ക്പഞ്ചായത്ത് അമ്പലത്തുകര വാര്‍ഡ്.

SHARE