ഹാദിയക്കു വേണ്ടി വാദിച്ചത് ബാഫഖി തങ്ങളുടെ പൗത്രനും ബീരാന്‍ സാഹിബിന്റെ മകനും; മുനവ്വറലി തങ്ങളുടെ പോസ്റ്റ് വൈറലാകുന്നു

സയ്യിദ് മുനവ്വറലി ശിഹാബ് തങ്ങള്‍

പ്രതീക്ഷകൾ അസ്തമിച്ച അന്ധകാരത്തിൽ നിന്നാണ് ഇന്ത്യയിലെ ന്യൂനപക്ഷത്തിന് വേണ്ടി ഖാഇദേമില്ലത്ത് മുഹമ്മദ് ഇസ്മാഈൽ സാഹിബ് ഒരു ചെറുതിരി കൊളുത്തിവെക്കുന്നത്.സമൂഹത്തിനും സമുദായത്തിനും വഴികാട്ടുന്ന കെടാ ദീപമായി പിന്നീടത് മാറുകയുണ്ടായി.വെല്ലുവിളികളെയും പ്രതിസന്ധികളെയും നിശ്ചയദാർഢ്യം കൊണ്ട് പ്രതിരോധിച്ച അതിജീവനത്തിന്റെ 70 സംവത്സരങ്ങൾ ദൈവികാനുഗ്രഹത്താൽ നാം പിന്നിട്ടിരിക്കുന്നു.

പൂർവ്വ സൂരികൾ സ്വപ്നം കണ്ട അഭിമാനകരമായ മുന്നേറ്റം സാമൂഹിക-സാംസ്‌കാരിക-വിദ്യാഭ്യാസ മേഖലയിൽ സാധ്യമാക്കാൻ ഇക്കാലയളവിനുള്ളിൽ നമുക്കേറെ സാധിച്ചിരിക്കുന്നു.സ്വസമുദായം വെള്ളംകോരികളും വിറകുവെട്ടികളുമായി അധഃപതിക്കരുതെന്ന സിഎച് മുഹമ്മദ് കോയ സാഹിബിന്റെ,മാനുഷിക സൗഹാർദത്തിനും സഹവർത്തിത്വത്തിനും വേണ്ടി ജീവിതം തപസ്സ്യയാക്കിയ പിതാവ് സയ്യിദ് മുഹമ്മദലി ശിഹാബ് തങ്ങളെയും പോലുള്ള മഹാമനീഷികളുടെ നിരന്തര ജാഗ്രതയും കരുതലും മഹത്തായ പരിവർത്തനത്തിലേക്ക് നമ്മെ നയിച്ചിരിക്കുന്നു.

മുസ്ലിം ലീഗിനെ സംബന്ധിച്ചു ചാരിതാർഥ്യ നിറവിന്റെ ഈ സന്തോഷദായകമായ വേളയിലാണ് ഹാദിയ വിഷയത്തിൽ സുപ്രീം കോടതിയിൽ നിന്നും അനുകൂലമായ വിധി വന്നിരിക്കുന്നത്.ഹാദിയ കേസിൽ വാദിച്ചത് സയ്യിദ് അബ്ദുറഹ്മാൻ ബാഫഖി തങ്ങളുടെ പൗത്രൻ കൂടിയായ അഡ്വ;മർസൂഖ് ബാഫഖിയായിരുന്നു. മറ്റൊരാൾ,സിഎച്ചിന്റെയും പിതാവ് സയ്യിദ് മുഹമ്മദലി ശിഹാബ് തങ്ങളുടേയുമൊക്കെ ആത്മസുഹൃത്തായിരുന്ന അഡ്വക്കേറ്റ് വികെ ബീരാൻ സാഹിബിന്റെ പുത്രൻ അഡ്വ.ഹാരിസ് ബീരാനുമാണ്.

നീതി നിഷേധിക്കപ്പെടുന്ന ന്യൂനപക്ഷ സമൂഹത്തിന്‌ വേണ്ടി രാജ്യത്തിന്റെ പരമോന്നത നീതിപീഠത്തിനകത്ത് പോലും വാദിക്കാൻ മുസ്ലിംലീഗിന്റെ പൈതൃകത്തിൽ നിന്നും പ്രതിനിധികൾ ഉണ്ടാവുന്നു എന്നത് നമ്മുടെ നേതാക്കൾ കണ്ട സ്വപ്നത്തിന്റെ സാക്ഷാത്കാരമാണ്.ഈ അഭിമാനാകരമായ നിലനിൽപ്പാണ് മുസ്ലിംലീഗ് പാർട്ടിയുടെ അതുല്യമായ സംഭാവന എന്നത്.അതിനിയും അഭംഗുരം തുടർന്ന് കൊണ്ടേയിരിക്കും.സർവശക്തൻ അനുഗ്രഹിക്കട്ടെ..