വിപണിയിലും ഞെട്ടിച്ച് നോക്കിയ 6; ഒറ്റ മിനുട്ടിനുള്ളില്‍ സ്‌റ്റോക്ക് കാലിയാക്കിയ വില്‍പന

ബെയ്ജിങ്: വിപണിയില്‍ സ്ഥാനം ഉറപ്പിക്കുന്നതിന് മുമ്പെ ഹിറ്റ് ലിസ്റ്റില്‍ സ്ഥാനം പിടിച്ച ആന്‍ഡ്രോയ്ഡിലേക്കു നോക്കിയയുടെ വരവ് വിപണിയിലും തുടരുന്നു. വിപണിയില്‍ എത്തിയ മിനുറ്റില്‍ തന്നെ സ്‌റ്റോക്ക് കാലിയാക്കിയാണ് നോക്കിയ 6ന്റെ ആദ്യ ഫ്‌ലാഷ് സെയില്‍ പൂര്‍ത്തിയാക്കിയത്. ചൈനീസ് വിപണി ഉദ്ദേശിച്ചു പുറത്തിറക്കിയ നോക്കിയ 6 ചൈനീസ് ഇ-കൊമേഴ്‌സ് പോര്‍ട്ടലായ ജെഡി.കോം വഴിയാണു അറുപത് സെക്കന്റ്‌കൊണ്ട് ഒന്നുപോലും ബാക്കിയില്ലാതെ വിറ്റുതീര്‍ന്നത്.

രജിസ്റ്റര്‍ ചെയ്തിട്ടുള്ളവര്‍ക്കു മാത്രമായിട്ടായിരുന്നു ആദ്യ വില്‍പ്പന. ആദ്യ ആന്‍ഡ്രോയ്ഡ് സ്മാര്‍ട്ട്‌ഫോണായി എച്ച്എംഡി ഗ്ലോബലിന് കീഴില്‍ പുറത്തിറങ്ങുന്ന നോക്കിയ 6, ദിവസങ്ങള്‍ക്ക് മുമ്പാണ് അതിന്റെ ഔദ്യോഗികമായി വരവറിയിച്ചത്. എന്നാല്‍ പുറത്തിറങ്ങുന്നതിന് മുന്നോടിയായി ആരംഭിച്ച രജിസ്‌ട്രേഷന് വന്‍പ്രതികരണമാണ് ലഭിച്ചത്. രജിസ്‌ട്രേഷന്‍ ആരംഭിച്ച ആദ്യ 24 മണിക്കൂറിനുള്ളില്‍ തന്നെ 250000 ത്തില്‍ അധികം ഉപഭോക്താക്കളാണ് നോക്കിയ 6നായി രജിസ്റ്റര്‍ ചെയ്തത്. ഇത് ആന്‍ഡ്രോയ്ഡ് ഫോണിലേക്കുള്ള നോക്കിയ മാറ്റത്തിന്റെ ജനസ്വീകാര്യത വ്യക്തമാക്കുന്നതായി. 10 ലക്ഷത്തിലേറെ പേര്‍ ഫോണിനായി ഇപ്പഴും രജിസ്റ്റര്‍ ചെയ്തു കാത്തിരിക്കുകയാണ്.

ആധുനിക സ്മാര്‍ട്ട് ഫോണിലെ എല്ലാ സാങ്കേതിക സവിശേഷതകളോടും കൂടെ കയ്യിലൊതുങ്ങുന്ന വിലയിലാണ് നോക്കിയ 6 പുറത്തിറങ്ങിയത്. ചൈനീസ് വിപണിയില്‍ 1699 യുവാനാണ് ഇതിന്റെ വില. ഇന്ത്യന്‍ വിലയില്‍ ഏകദേശം 16,000 രൂപവരും.

5.5 ഇഞ്ച് ഫുള്‍ എച്ച്ഡി ഡിസ്‌പ്ലേ, 2.5 ഡി ഗോറില്ല ഗ്ലാസ്, 4ജിബി റാം, 64 ജിബി ഇന്റേണല്‍ മെമ്മറി, 3000 എംഎഎച്ച് ബാറ്ററി(അഴിച്ചു മാറ്റാന്‍ പറ്റാത്ത മോഡല്‍), ഡ്യുവല്‍ സിം, 16 മെഗാപിക്‌സല്‍ റിയര്‍ ക്യമറ, 8 മെഗാപിക്‌സല്‍ ഫ്രണ്ട് ക്യാമറ, ആന്‍ഡ്രോയ്ഡ് നൗഗട്ട് അധിഷ്ടിത ഓപ്പറേറ്റിങ് സിസ്റ്റം, ഡോള്‍ബി അറ്റ്‌മോസ് ശബ്ദ സംവിധാനം എന്നിവ നോക്കിയ 6ന്റെ പ്രത്യേകതകളാണ്.

ചൈനീസ് ഇ-കൊമേഴ്‌സ് പോര്‍ട്ടലായ ജെഡി.കോമിലെ നോക്കിയ 6ന്റെ ലിങ്ക്
ചൈനീസ് ഇ-കൊമേഴ്‌സ് പോര്‍ട്ടലായ ജെഡി.കോമിലെ നോക്കിയ 6ന്റെ ലിങ്ക്

ഇന്നു വില്‍പ്പന ആരംഭിച്ച് ഒരു മിനിറ്റാകുംമുന്‍പേ എല്ലാ ഫോണും വിറ്റു. ഓണ്‍ലൈന്‍ പോര്‍ട്ടില്‍ ഇപ്പോള്‍ ഔട്ട് ഓഫ് സ്റ്റോക്ക് എന്നാണ് കാണിക്കുന്നത്. അതേസമയം വിപണിയിലെത്തിയ ഫോണുകളുടെ എണ്ണത്തെ കുറിച്ചോ എത്ര ഫോണുകള്‍ വിറ്റുപോയെന്നോ സംബന്ധിച്ച വിവരം കമ്പനി പുറത്തുവിട്ടിട്ടില്ല. എന്നാല്‍, വിപണിയില്‍ പുതിയ ഫോണ്‍ സഷ്ടിക്കുന്ന ചലനംമനസിലാക്കാന്‍ നോക്കിയ 6 നിര്‍മാതാക്കളായ എച്ച്എംഡി ഗ്ലോബല്‍ നടത്തിയ ലിറ്റ്മസ് ടെസ്റ്റ് ഫലം തീര്‍ത്തും വിജയകരമായി.

SHARE