ഓണം ബംപര്‍ പത്തുകോടി വാടകവീട്ടിലേക്ക്; അടിച്ചയാളെ കണ്ടെത്തി

തൃശൂര്‍: കേരള സംസ്ഥാന ലോട്ടറിയുടെ ഓണം ബംപറിന്റെ ഒന്നാം സമ്മാനം 10 കോടി രൂപ അടിച്ചയാളെ കണ്ടെത്തി. തൃശൂര്‍ അടാട്ട് സ്വദേശി വല്‍സലക്കാണ് ലോട്ടറി അടിച്ചിരിക്കുന്നത്. തൃശൂര്‍ ചിറ്റിലപ്പള്ളി സ്വദേശിയായ ഇവര്‍ ഇപ്പോള്‍ അടാട്ട് ഒരു വാടക വീട്ടിലാണ് താമസിക്കുന്നത്.

തൃശൂര്‍ പടിഞ്ഞാറേക്കോട്ടയിലെ എസ്.എസ്. മണിയന്‍ ഏജന്‍സി വിറ്റ ടിബി 128092 ടിക്കറ്റിനാണ് ഇവര്‍ക്ക് സമ്മാനം ലഭിച്ചത്. വല്‍സലക്ക് ഏജന്‍സി കമ്മിഷനും നികുതിയും കിഴിച്ച് 6.34 കോടി രൂപ ലഭിക്കും. ടിക്കറ്റ് വിറ്റ ഏജന്റിന് ഒരു കോടി രൂപയും കിട്ടും. 10 സീരിസുകളിലായി ആകെ 45 ലക്ഷം ഓണം ബംപര്‍ ടിക്കറ്റുകളാണ് ഇത്തവണ ലോട്ടറി വകുപ്പ് അച്ചടിച്ചത്. ഇതില്‍ 43.11 ലക്ഷം ടിക്കറ്റുകള്‍ വിറ്റു. ടിക്കറ്റ് വില 250 രൂപയായിരുന്നു.

രണ്ടാം സമ്മാനമായ അരക്കോടി രൂപ 10 പേര്‍ക്കും മൂന്നാം സമ്മാനമായ 10 ലക്ഷം രൂപ 20 പേര്‍ക്കും ലഭിക്കും. സമാശ്വാസ സമ്മാനമായ അഞ്ചുലക്ഷം രൂപ ഒന്‍പതു പേര്‍ക്കു നല്‍കും. 20 പേര്‍ക്ക് ലഭിക്കുന്ന നാലാം സമ്മാനത്തുകയും അഞ്ചു ലക്ഷമാണ്. ഇന്നലെയായിരുന്നു നറുക്കെടുപ്പ്.

SHARE