ശമ്പളവും പെന്‍ഷനും ഇന്ന് മുതല്‍ വിതരണം ചെയ്യും

തിരുവനന്തപുരം: പുതുവര്‍ഷത്തിലെ ശമ്പളവും പെന്‍ഷനും ഇന്നുമുതല്‍ വിതരണം ചെയ്യും. നോട്ട് പ്രതിസന്ധിയെതുടര്‍ന്ന് ഈ വര്‍ഷത്തിലും ശമ്പളവും പെന്‍ഷനും വിതരണം ചെയ്യുന്നത് നീളുമെന്ന് സൂചനയുണ്ടായിരുന്നു. എന്നാല്‍ ഇന്ന് മുതല്‍ മുഴുവന്‍ പണവും ജീവനക്കാരുടെ അക്കൗണ്ടുകളില്‍ എത്തുമെന്ന് ധനമന്ത്രി ഡോ തോമസ് ഐസക് പറഞ്ഞു.

രണ്ടുദിവസത്തെ അവധിക്കുശേഷമാണ് ഇന്ന് മുതല്‍ ജീവനക്കാര്‍ ജോലിക്ക് എത്തിച്ചേരുന്നത്. സര്‍ക്കാര്‍ മേഖലയില്‍ 3600 കോടി രൂപയും, സ്വകാര്യ മേഖലയില്‍ മൂവായിരം കോടിയോളവുമാണ് ശമ്പളം വിതരണം ചെയ്യാന്‍ ആവശ്യമായി വരുന്നത്. ശമ്പളം അക്കൗണ്ടുകളില്‍ എത്തുമെന്ന് പറയുന്നുണ്ടെങ്കിലും എത്രരൂപ പിന്‍വലിക്കാനാകും എന്ന കാര്യത്തില്‍ സര്‍ക്കാരിന് ഉറപ്പുപറയാനാകില്ല.

റിസര്‍വ് ബാങ്ക് അനുവദിച്ച 400 കോടിയടക്കം, എസ്ബിടിയില്‍ 1400 കോടി രൂപ നീക്കിയിരുപ്പുണ്ട്. ട്രഷറിയില്‍ 660 കോടിയിലേറെയും ബാക്കിയുണ്ട്. മൂന്ന് ദിവസത്തേക്ക് വിതരണം ചെയ്യാന്‍ ഈ തുക മതിയാകുമെന്നാണ് കണക്കുകൂട്ടല്‍. നോട്ട് പിന്‍വലിച്ചതിനെ തുടര്‍ന്ന് കഴിഞ്ഞ ഡിസംബറില്‍ ശമ്പളം വിതരണം ചെയ്യുന്നതിന് തടസ്സം അനുഭവപ്പെട്ടിരുന്നു.

SHARE