തിരുവനന്തപുരം: സന്തോഷ് ട്രോഫി ഫുട്ബോള്‍ ജേതാക്കളായ കേരളാ ടീമിന് സംസ്ഥാന സര്‍ക്കാറിന്റെയും വിവിധ സംഘടനകളുടെയും നേതൃത്വത്തില്‍ ആവേശ്വോജ്ജ്വല സ്വീകരണം. ഇന്നലെ രാവിലെ തലസ്ഥാനത്തെത്തിയ ടീമിനെ ജില്ലാ ഫുട്ബോള്‍ അസോസിയേഷന്റെ നേതൃത്വത്തില്‍ റെയില്‍വേ സ്റ്റേഷനില്‍ സ്വീകരിച്ചു. തുടര്‍ന്ന് 11.30ന് പത്രപ്രവര്‍ത്തക യൂണിയന്‍ തിരുവനന്തപുരം ജില്ലാ കമ്മിറ്റിയുടെ നേതൃത്വത്തില്‍ സ്വീകരണം നല്‍കി. സ്റ്റാച്യു ജംഗ്ഷനില്‍ നിന്നും വാദ്യമേളങ്ങളുടെ അകമ്പടിയോടെയാണ് ടീമിനെ പത്രപ്രവര്‍ത്തക യൂണിയന്‍ ആസ്ഥാനമായ കേസരിയിലേക്ക് ആനയിച്ചത്. അവിടെ നടന്ന സമ്മേളനത്തില്‍ കായികമന്ത്രി എ.സി മൊയ്തീന്‍ ടീം അംഗങ്ങളെ മൊമെന്റോ നല്‍കി ആദരിച്ചു. ഉച്ചകഴിഞ്ഞ് മൂന്നിന് മ്യൂസിയത്തു നിന്നും തുറന്ന ജീപ്പിലാണ് താരങ്ങളെ സംസ്ഥാന സര്‍ക്കാര്‍ സ്വീകരണ വേദിയായ സെന്‍ട്രല്‍ സ്റ്റേഡിയത്തിലേക്ക് ആനയിച്ചത്. റോളര്‍ സ്‌കേറ്റിംഗ്, അശ്വാരൂഢ സേന ഉള്‍പ്പെടെയുള്ളവയുടെ അകമ്പടിയോടെയായിരുന്നു താരങ്ങളെ സമ്മേളന സ്ഥലത്ത് എത്തിച്ചത്. കളിക്കാര്‍ക്കും കോച്ചിനും മാനേജര്‍ക്കും ഉള്‍പ്പെടെ കാഷ് അവാര്‍ഡും ഫലകവും സമ്മാനിച്ചു.
കിരീടം സ്വന്തമാക്കിയ കേരളാ ടീമിന് ഇനിയുമേറെ നേട്ടങ്ങള്‍ സ്വന്തമാക്കാന്‍ കഴിയുമെന്ന് മുഖ്യമന്ത്രി പിണറായി വിജയന്‍. സ്വീകരണ സമ്മേളനം ഉദ്ഘാടനം ചെയ്യുകയായിരുന്നു മുഖ്യമന്ത്രി. ഒരുപാട് ഇല്ലായ്മകളുടെ പ്രതീകങ്ങളാണ് ഇവരില്‍ പലരും. എന്നാല്‍ ഫുട്ബോളില്‍ ഇവര്‍ക്കു ഇനിയുമേറെ നേടാന്‍ സാധിക്കും. ടീമംഗങ്ങള്‍ എല്ലാവരും ഒന്നിനൊന്നു മികച്ച രീതിയില്‍ കളിച്ചതോടെയാണ് കേരളത്തിലേക്ക് സന്തോഷ് ട്രോഫി എത്തിക്കാന്‍ സാധിച്ചത്. നാടിന്റെ മികവ് ഉര്‍ത്തിപ്പിടിക്കാന്‍ ഇവര്‍ക്ക് സാധിച്ചു. ഈ ടീമിന്റെ പ്രോത്സാഹനത്തിന് ആവശ്യമായ എല്ലാ നടപടികളും സര്‍ക്കാരിന്റെ ഭാഗത്തു നിന്നും ഉണ്ടാകും. കൂടുതല്‍ തിളക്കമാര്‍ന്ന ഫുട്ബോള്‍ ജീവിതം ഇവര്‍ക്ക് ആശംസിക്കുന്നതായും മുഖ്യമന്ത്രി പറഞ്ഞു. കായിക മന്ത്രി എ.സി മൊയ്തീന്‍, മന്ത്രിമാരായ കടകംപള്ളി സുരേന്ദ്രന്‍, കടന്നപ്പള്ളി രാമചന്ദ്രന്‍, വി.എസ് സുനില്‍കുമാര്‍, സി. രവീന്ദ്രനാഥ്, അഡ്വ.കെ.രാജു സ്‌പോര്‍ട്‌സ് കൗണ്‍സില്‍ പ്രസിഡണ്ട് ടി.പി ദാസന്‍, കെ.എഫ്.എ പ്രസിഡണ്ട് കെ.എം.ഐ മേത്തര്‍ തുടങ്ങിയവരും ചടങ്ങില്‍ സന്നിഹിതരായിരുന്നു. മികച്ച ഫുട്‌ബോള്‍ ഗ്രൗണ്ടുകളുടെ അഭാവമാണ് കേരള ഫുട്‌ബോള്‍ നേരിടുന്ന പ്രധാന വെല്ലുവിളിയെന്ന് സന്തോഷ് ട്രോഫി പരിശീലകന്‍ സതീവന്‍ ബാലന്‍. കേരള പത്രപ്രവര്‍ത്തക യൂണിയന്‍ ജില്ലാ കമ്മിറ്റിയുടെ ആഭിമുഖ്യത്തില്‍ കേരള ടീമിന് തിരുവനന്തപുരത്ത് നല്‍കിയ സ്വീകരണത്തിന് ശേഷം നടന്ന മീറ്റ് ദി പ്രസ് പരിപാടിയില്‍ സംസാരിക്കുകയായിരുന്നു അദ്ദേഹം. കൊച്ചിയെയും കോഴിക്കോടിനെയും മാറ്റി നിര്‍ത്തിയാല്‍ നിലവാരമുള്ള ഗ്രൗണ്ടുകള്‍ സംസ്ഥാനത്തില്ല. അതിനാലാണ് സന്തോഷ് ട്രോഫിയുടെ പരിശീലന ക്യാമ്പ് തിരുവനന്തപുരത്ത് നിന്ന് കോഴിക്കോടേക്ക് മാറ്റിയത്. കാര്യവട്ടം എല്‍.എന്‍.സി.പി.ഇയിലെ ഫുട്ബാള്‍ ഗ്രൗണ്ടില്‍ പരിശീലനത്തിനിടെ നിരവധി താരങ്ങള്‍ക്ക് പരിക്കേറ്റിരുന്നു. മികച്ച സൗകര്യങ്ങള്‍ ലഭ്യമാക്കിയാലെ കേരള ഫുട്ബാള്‍ മുന്നോട്ടുപോകൂവെന്നും അദ്ദേഹം പറഞ്ഞു. വിജയത്തോടെ ടീം അംഗങ്ങളില്‍ പലര്‍ക്കും കേരള ബ്ലാസ്റ്റേഴ്‌സ് അടക്കമുള്ള വമ്പന്‍ ക്ലബുകളില്‍ നിന്ന് ഓഫറുകള്‍ വരുന്നുണ്ട്. എന്നാല്‍ ഡിഗ്രി വിദ്യാഭ്യാസം പൂര്‍ത്തിയാകുന്നതുവരെ അത്തരം കരാറുകളില്‍ നിന്ന് അകന്ന് നില്‍ക്കാനാണ് കളിക്കാരോട് ആവശ്യപ്പെട്ടിട്ടുള്ളത്. വമ്പന്‍ ടീമുകളില്‍ പോയി കളിക്കാതെ പുറത്തിരിക്കുന്നതിനെക്കാള്‍ നല്ലത് കേരളത്തിലെ ഏതെങ്കിലും ടീമില്‍ ചേര്‍ന്ന് കളിക്കുന്നതാണ്. സര്‍ക്കാര്‍ ജോലി ലഭിച്ചാലും താരങ്ങള്‍ ഫുട്ബാള്‍ ഉപേക്ഷിക്കരുതെന്നും അദ്ദേഹം ആവശ്യപ്പെട്ടു. സന്തോഷ് ട്രോഫിക്ക് വേണ്ടിയുള്ള ടീമിനെ തെരഞ്ഞെടുക്കുന്നതില്‍ ബാഹ്യ ഇടപെടലുകളോ സമ്മര്‍ദങ്ങളോ ഉണ്ടായിട്ടില്ല. അര്‍ഹതയുള്ള ഒരു കളിക്കാരനും ടീമിന് പുറത്തുപോകരുതെന്ന് മാത്രമായിരുന്നു ആഗ്രഹം-അദ്ദേഹം പറഞ്ഞു.