‘കേരളത്തിന്റെ ആദര്‍ശം ഇതാ’; സഫയെ രാജ്യത്തിന് പരിചയപ്പെടുത്തി രാഹുല്‍ ഗാന്ധി

മലപ്പുറം: മലപ്പുറം കരുവാരക്കുണ്ട് ജി.എച്ച്.എസ്.എസിലെ സയന്‍സ് ലാബ് ഉദ്ഘാടനത്തിന് താന്‍ നടത്തിയ പ്രസംഗം തര്‍ജമ ചെയ്ത അതേ സ്‌കൂള്‍ വിദ്യാര്‍ത്ഥിയായ സഫ ഫെബിയെ രാജ്യത്തിന് പരിചയപ്പെടുത്തി വയനാട് എം.പി രാഹുല്‍ ഗാന്ധി. സ്‌കൂളിലെ പ്ലസ് ടു വിദ്യാര്‍ഥിനി സഫ ഫെബി തന്റെ പ്രസംഗം പരിഭാഷപ്പെടുത്തുന്ന വീഡിയോ തന്റെ ഔദ്യോഗിക സോഷ്യല്‍ മീഡിയ അക്കൗണ്ടിലൂടെ പങ്കുവെച്ചാണ് രാഹുല്‍ വിദ്യാര്‍ഥിയേയും അതുവഴി കേരത്തിന്റെ വിദ്യാഭ്യാസ നിലവാരത്തേയും അഭിനന്ദിച്ചത്.

കേരളത്തിന്റെ ആദര്‍ശം ഇതാ പ്രവര്‍ത്തിയില്‍, എന്ന വാചകത്തോടെയാണ് രാഹുല്‍ വീഡിയോ പങ്കുവെച്ചത്. പോസ്റ്റ് പങ്കുവച്ചതിന് പിന്നാലെ സഫ ഫെബിക്കും രാഹുല്‍ ഗാന്ധിക്കും അഭിനന്ദന കമന്റുകളുമായി രാജ്യത്തെ വിവിധ മേഖലകളില്‍ ആളുകള്‍ എത്തി.

തന്റെ പ്രസംഗം പരിഭാഷപ്പെടുത്താന്‍ വിദ്യാര്‍ഥികളിലാരെങ്കിലും സ്‌റ്റേജിലേക്കു വരാമോ എന്ന രാഹുലിന്റെ ചോദ്യത്തിനു പിന്നാലെയാണ് അതേ സ്‌കൂളിലെ പ്ലസ് ടു വിദ്യാര്‍ഥിനി സഫ ഫെബി സ്‌റ്റേജിലെത്തിയത്.

അച്ചടിഭാഷയില്ലാതെ, നാടന്‍ ശൈലിയിലുള്ള സഫയുടെ പരിഭാഷയാണു സാമൂഹ്യമാധ്യമങ്ങളില്‍ കൈയ്യടി നേടുന്നത്. സഫയുടെ പരിഭാഷയെ അഭിനന്ദിച്ചുകൊണ്ട് കോണ്‍ഗ്രസിന്റേതടക്കമുള്ള ഫേസ്ബുക്ക് അക്കൗണ്ടുകള്‍ രാഹുലിന്റെ പ്രസംഗം പോസ്റ്റ് ചെയ്തിട്ടുണ്ട്.

രാഹുലിന്റെ ഇംഗ്ലീഷ് പ്രസംഗത്തിലെ ചില വരികള്‍ ഒരു സങ്കോചവുമില്ലാതെയായിരുന്നു സഫ പരിഭാഷപ്പെടുത്തിയത്. പ്രസംഗത്തിലുടനീളം സയന്‍സിനെക്കുറിച്ചായിരുന്നു രാഹുല്‍ സംസാരിച്ചത്.

‘സയന്‍സില്‍ ഉത്തരങ്ങളേക്കാള്‍ പ്രാധാന്യമര്‍ഹിക്കുന്നതു തുടര്‍ച്ചയായിട്ടുള്ള ചോദ്യങ്ങളാണ് എന്നുപറഞ്ഞ രാഹുല്‍ അടുത്തതായി പറഞ്ഞത് ഇങ്ങനെയാണ് ‘There is nothing known as a stupid question or a foolish question.’ ഇതിനു സഫ നല്‍കിയ പരിഭാഷയാണ് ഏറ്റവുമധികം കൈയ്യടി നേടുന്നത്. അതിങ്ങനെയായിരുന്നു ‘ഒരിക്കലും ഒരു പൊട്ട ചോദ്യം, അല്ലെങ്കില്‍ മണ്ടന്‍ ചോദ്യം എന്നുപറയുന്ന ഒരു സംഭവമില്ല.’

പ്രസംഗത്തില്‍ വയനാട്ടില്‍ പാമ്പുകടിയേറ്റു മരിച്ച ഷെഹ്‌ല ഷെറിനെക്കുറിച്ചു സംസാരിച്ച രാഹുല്‍, സ്‌കൂളുകളിലെ അടിസ്ഥാന സൗകര്യവുമായി ബന്ധപ്പെട്ട വിഷയം പാര്‍ലമെന്റില്‍ ഉയര്‍ത്തുമെന്നു വ്യക്തമാക്കി.

തന്റെ എം.പി ഫണ്ട് വളരെക്കുറവാണെങ്കിലും വിദ്യാര്‍ഥികളുടെ ആവശ്യങ്ങള്‍ നിറവേറ്റാന്‍ ശ്രമിക്കുമെന്നും അദ്ദേഹം പറഞ്ഞു. പ്രസംഗത്തിന്റെ അവസാനം സഫയ്ക്കു നന്ദി പറഞ്ഞ രാഹുല്‍, അതിനുശേഷം സഫയ്ക്ക് ചോക്ലേറ്റ് നല്‍കുകയും ചെയ്തു.

രാഹുലിനെ ഇഷ്ടമായിരുന്നെന്നും പരിഭാഷ ചെയ്യാന്‍ കഴിയുമെന്നു പ്രതീക്ഷിച്ചിരുന്നില്ലെന്നുമായിരുന്നു സഫ മാധ്യമപ്രവര്‍ത്തകരോടു പറഞ്ഞത്. വേദിയില്‍ എ.ഐ.സി.സി ജനറല്‍ സെക്രട്ടറി കെ.സി വേണുഗോപാല്‍ അടക്കമുള്ള കോണ്‍ഗ്രസ് നേതാക്കളും ഉണ്ടായിരുന്നു.