ഇന്ത്യന്‍ ക്രിക്കറ്റ് ടീം സെലക്ഷനെ രൂക്ഷമായി വിമര്‍ശിച്ച് ക്രിക്കറ്റ് ഇതിഹാസം സച്ചിന്‍ തെണ്ടുല്‍ക്കര്‍

ഇന്ത്യന്‍ ക്രിക്കറ്റ് ടീം സെലക്ഷനെതിരെ രൂക്ഷമായി പ്രതികരിച്ച് ക്രിക്കറ്റ് ഇതിഹാസം സച്ചിന്‍ തെണ്ടുല്‍ക്കര്‍ രംഗത്ത്. കളിക്കാരുടെ ടീം സെലക്ഷന്‍ യോ യോ ടെസ്റ്റ് മാത്രമല്ല നോക്കിയല്ല മറിച്ച് കളിക്കാരന്റെ കഴിവും കണക്കിലെടുത്താവണമെന്ന് സച്ചിന്‍ പ്രതികരിച്ചു. കഴിഞ്ഞ സീസണില്‍ ഐ.പി.എല്ലില്‍ മിന്നും പ്രകടനം പുറത്തെടുത്ത അമ്പാട്ടി റായിഡുവും മലയാളി താരം സഞ്ജുവും യോ യോ ടെസ്ററില്‍ പരാജയപ്പെട്ടതിനേ തുടര്‍ന്ന് ഇന്ത്യ എ ടീമില്‍ നിന്നും നേരത്തെ ഒഴിവാക്കിയിരുന്നു. തുടര്‍ന്നാണ് യോ യോ ടെസ്റ്റ് ടീം തെരഞ്ഞെടുപ്പില്‍ മാനദണ്ഡമാക്കുന്നതിനെതിരെ മാസ്റ്റര്‍ ബ്ലാസ്റ്റര്‍ തന്നെ രംഗത്തെത്തിയത്.

‘ തീര്‍ച്ചയായും യോ യോ ടെസ്റ്റിന്റെ പ്രാധാന്യത്തേക്കുറിച്ച് ചര്‍ച്ച ചെയ്യേണ്ടതുണ്ട്. ഞാന്‍ ഒരിക്കലും യോ യോ ടെസ്റ്റിന്റെ ഭാഗമായിട്ടില്ല. ഞാന്‍ കളിക്കുന്ന കാലഘട്ടത്തില്‍ ബീപ് ടെസ്റ്റായിരുന്നു. യോ യോ ടെസ്റ്റിനോട് സാമ്യമുള്ളതും തുല്യതപാലിക്കുന്നതുമായ ഒന്നാണ് അത്. പക്ഷെ ടീമിലെടുക്കുന്നതിന്റെ മാനദണ്ഡം അതുമാത്രമായിരുന്നില്ല. ഫിറ്റ്നസ്സിനൊപ്പം തന്നെ ഒരു കളിക്കാരന്റെ കഴിവും കണക്കിലെടുക്കുമായിരുന്നു.’ സച്ചിന്‍ പറഞ്ഞു.

മൊഹമ്മദ് ഷമിയ്ക്ക് യോ യോ ടെസ്റ്റില്‍ പരാജയപ്പെട്ടതിനേ തുടര്‍ന്നാണ് അഫ്ഗാനിസ്ഥാനെതിരായ ടെസ്റ്റ് നഷ്ടമായിരു്ന്നു. ജനുവരിയില്‍ ജൊഹ്നാസ്ബര്‍ഗില്‍ നടന്ന ടെസ്റ്റ് മത്സരത്തിനു ശേഷം ഒരു അന്താരാഷ്ട്രമത്സരം പോലും ഷമിയ്ക്ക് കളിക്കാനായിട്ടില്ല. എന്നാല്‍ യോ യോ ടെസ്റ്റില്‍ പാസ്സായതിനേ തുടര്‍ന്ന് ഇംഗ്ലണ്ടിനെതിരായ ടെസ്റ്റ് പരമ്പരക്കുള്ള സ്‌ക്വാഡില്‍ ഷമിയും ഉള്‍പ്പെടുത്തി. അതേസമയം ധോണിയുടെ ടീമിലെ സ്ഥാനത്തിന് ഫിറ്റ്നസ്സും കഴിവും ഒരു മാനദണ്ഡമല്ല എന്ന തരത്തിലുള്ള ആക്ഷേപവും വിമര്‍ശനവും പലഭാഗത്തും നിന്നും ഉയരുന്നുണ്ട്. നിലവില്‍ ഇന്ത്യന്‍ ടീം തെരഞ്ഞെടുപ്പിന് യോ യോ ടെസ്ററ് ഫലത്തിന്റെ അടിസ്ഥാനത്തിലാണ്

ഇടവേളയ്ക്കു ശേഷം മടങ്ങിയെത്തിയ ചെന്നൈ സൂപ്പര്‍ കിങ്‌സിനെ ഐ.പി.എല്‍ ചാമ്പ്യന്‍മാരാക്കിയതില്‍ നിര്‍ണായകമായത് അമ്പാട്ടി റായിഡുവിന്റെ പ്രകടനമായിരുന്നു. മൂന്ന് അര്‍ദ്ധ സെഞ്ച്വറിയും ഒരു സെഞ്ച്വറിയും ടീമിനായി നേടി അത്യുഗ്രന്‍ ഫോമിലായിരുന്നു താരം. എന്നാല്‍ യോ യോ ടെസ്റ്റെന്ന കടമ്പ മറികടക്കാന്‍ കഴിയാത്തതുമൂലം ഇന്ത്യ എ ടീമില്‍ നിന്നും തഴയപ്പെടുകയായിരുന്നു റായിഡു.സമാന അനുഭവം തന്നെയായിരുന്നു മലയാളി താരം സഞ്ജുവിനും നേരിടേണ്ടി വന്നത്.