റഷ്യന് കൂലിപ്പട്ടാളത്തില് ചേര്ന്ന 12 ഇന്ത്യക്കാര് ഇതുവരെ കൊല്ലപ്പെട്ടെന്ന് വിദേശകാര്യ മന്ത്രാലയം. അവശേഷിക്കുന്ന പതിനെട്ട് പേരില് 16 പേരെ കുറിച്ച് വിവരമില്ല.
ഉക്രൈന് യുദ്ധഭൂമിയില് പരിക്കേറ്റ മലയാളി മോസ്കോയില് ചികില്സയില് തുടരുകയാണ്. 96 പേരെ ഇതിനോടകം തിരികെ എത്തിച്ചെന്നും വിദേശകാര്യ വക്താവ് റണ്ദീര് ജയ്സ്വാള് പറഞ്ഞു.
കഴിഞ്ഞ ആഴ്ചയാണ് റഷ്യയില് ഷെല്ലാക്രമണത്തില് തൃശൂര് കുട്ടനെല്ലൂര് സ്വദേശി ബിനില് ബാബു കൊല്ലപ്പെട്ടത്. ബിനിലിന്റെ ബന്ധു കൂടിയായ ജയിന് കുര്യനും സമാനമായി ഷെല്ലാക്രമണത്തില് പരുക്കേറ്റ് ഗുരുതരാവസ്ഥയിലാണ്. ഇലക്ട്രീഷ്യന്മാരായ ഇരുവരും റിക്രൂട്ടിങ് ചതിയില്പെട്ടാണ് റഷ്യന് കൂലിപ്പട്ടാളത്തിലെത്തിയത്.
ഇവര്ക്കു പുറമെ കേരളത്തില്നിന്നും ഇന്ത്യയുടെ വിവിധഭാഗങ്ങളില്നിന്നും നിരവധി പേര് സമാനമായ രീതിയില് ചതിക്കപ്പെട്ട് റഷ്യയിലെത്തുകയും നിര്ബന്ധിതമായി കൂലിപ്പട്ടാളത്തിന്റെ ഭാഗമാവുകയും ചെയ്തിട്ടുണ്ട്. വിഷയത്തില് എന്ഐഎ അന്വേഷണം ആരംഭിച്ചിട്ടുണ്ട്.