കാസര്കോട് പതിനാറുകാരന് പീഡനത്തിനിരയായ സംഭവത്തില് പ്രതിയായ ഉപജില്ലാ വിദ്യാഭ്യാസ ഓഫീസറെ സസ്പെന്ഡ് ചെയ്തു. ബേക്കല് ഉപജില്ലാ വിദ്യാഭ്യാസ ഓഫീസര് സൈനുദ്ദീനെയാണ് സസ്പെന്ഡ് ചെയ്തത്. വിദ്യാഭ്യാസ വകുപ്പ് ഇതുസംബന്ധിച്ച ഉത്തരവ് ഇറക്കി.
ഗേ ഡേറ്റിംഗ് ആപ്പ് വഴിയാണ് പ്രതികള് വിദ്യാര്ത്ഥിയെ പരിചയപ്പെട്ടത്. കേസില് പതിനാല് പ്രതികളാണുളളത്. ഇവരില് ആറ് പേരെ ഇതുവരെ പൊലീസ് കസ്റ്റഡിയിലെടുത്തു. ബാക്കി പ്രതികള്ക്കായുള്ള അന്വേഷണം ജില്ലയുടെ പുറത്തും വ്യാപിപ്പിച്ചിട്ടുണ്ട്. കൂടുതല് പേര് സംഭവത്തില് ഉള്പ്പെട്ടിട്ടുണ്ടോയെന്ന് അന്വേഷിക്കും.
വിദ്യാര്ത്ഥിയുടെ അമ്മയുടെ ഇടപെടലിലാണ് വിവരം പുറത്ത് അറിയുന്നത്. കഴിഞ്ഞ ദിവസം വീട്ടില്നിന്ന് ഒരാള് ഇറങ്ങി ഓടുന്നത് കുട്ടിയുടെ അമ്മ കണ്ടിരുന്നു. തുടര്ന്ന് സംശയം തോന്നിയ അമ്മ വിദ്യാര്ത്ഥിയുടെ ഫോണ് പരിശോധിക്കുകയായിരുന്നു. തുടര്ന്ന് പൊലീസില് വിവരമറിയിച്ചു. പിന്നാലെ ചൈല്ഡ്ലൈന് പ്രവര്ത്തകര് കുട്ടിയോട് സംസാരിച്ചപ്പോഴാണ് ദീര്ഘകാലമായി പലരും കുട്ടിയെ പീഡിപ്പിക്കുകയായിരുന്നു എന്ന ഞെട്ടിക്കുന്ന വിവരം പുറത്തുവന്നത്.