ലഖ്നൗ: ഉത്തര്പ്രദേശിലെ പ്രയാഗ്രാജില് 17കാരിയെ കഴുത്തറുത്ത് കൊന്ന് മൃതദേഹം കുഴിച്ചുമൂടിയ സൈനികനെ പൊലീസ് അറസ്റ്റ് ചെയ്തു. നവംബര് 10നാണ് സംഭവം. ദീപക് എന്ന സൈനികനെയാണ് ഗംഗാനഗര് പൊലിസ് കസ്റ്റഡിയില് എടുത്തത്.
ദീപക്ക് നവംബര് 30ന് മറ്റൊരു യുവതിയെ വിവാഹം കഴിക്കാന് നിശ്ചയിച്ചിരുന്നതറിഞ്ഞ പെണ്സുഹൃത്ത് തന്നെ വിവാഹം കഴിക്കണമെന്ന് ആവശ്യപ്പെട്ടിരുന്നു. ആവശ്യം നിരസിച്ച ദീപക്, നവംബര് 10ന് പെണ്കുട്ടിയെ വിളിച്ചുവരുത്തി ബൈക്കില് ഒരു തോട്ടത്തിലേക്ക് കൊണ്ടുപോയി. തുടര്ന്ന് കത്തി ഉപയോഗിച്ച് കഴുത്തറുത്ത് കൊന്ന്, അവിടെതന്നെ കുഴിച്ചുമൂടുകയായിരുന്നു.
നവംബര് 15ന് തോട്ടത്തില് നിന്ന് മൃതദേഹം കണ്ടെത്തിയതോടെ കേസ് ശക്തമായി. സ്ഥലത്ത് കണ്ടെത്തിയ ബാഗില് പേരും ഫോണ്നമ്പറും രേഖപ്പെടുത്തിയിരുന്ന ഒരു ബുക്കും പൊലീസിന് പ്രതിയെ തിരിച്ചറിയാനായി സഹായമായി. തട്ടിക്കൊണ്ടുപോകല് കേസ് രജിസ്റ്റര് ചെയ്ത പൊലിസ്, പോസ്റ്റ്മോര്ട്ടത്തിന് ശേഷം കൊലപാതകക്കുറ്റവും ചേര്ത്തു.
പ്രതി പെണ്കുട്ടിയെ ബൈക്കില് കൊണ്ടുപോകുന്ന സിസിടിവി ദൃശ്യങ്ങളും പൊലീസ് ശേഖരിച്ചു. ഇന്സ്റ്റാഗ്രാം വഴി പരിചയപ്പെട്ട പെണ്കുട്ടിയുമായി താന് അടുപ്പത്തിലായിരുന്നുവെന്നും വിവാഹം ഉറപ്പായതോടെ പെണ്കുട്ടി സമ്മര്ദം ചെലുത്തിയതാണെന്നും ദീപക് മൊഴി നല്കി.
പഠനത്തിനായി കന്റോണ്മെന്റ് പ്രദേശത്തെ അമ്മാവന്റെ വീട്ടില് താമസിക്കുകയായിരുന്നു മരിച്ച 17കാരി. സംഭവത്തില് കൂടുതല് അന്വേഷണം തുടരുകയാണ്.