ഡല്ഹിയില് വായു മലിനീകരണം അതിരൂക്ഷമായി തുടരുന്നു. ഭൂരിഭാഗം പ്രദേശങ്ങളും പുകമഞ്ഞാല് മൂടപ്പെട്ടു.ബിഎസ്3 പെട്രോള്, ബിഎസ്4 ഡീസല് കാറുകള്ക്ക് ഡല്ഹി സര്ക്കാര് നിരോധനം ഏര്പ്പെടുത്തി. ഡല്ഹി, നോയിഡ, ഗുരുഗ്രാം, ഗാസിയാബാദ്, ഫരീദാബാദ് എന്നിവിടങ്ങളില് വായു മലിനീകരണം രൂക്ഷമാണ്.
ഡല്ഹി ഐ.ടി.ഒ വായു ഗുണനിലവാര സൂചിക ഗുരുതര അവസ്ഥയായ 428 രേഖപ്പെടുത്തി. ആനന്ദ് വിഹാര്, ചാണക്യപുരി, കോണോട്ട് പ്ലേസ്,ദ്വാരക സെക്ടര് തുടങ്ങിയ പ്രദേശങ്ങളില് വായു മലിനീകരണം അപകടകരമായ അവസ്ഥയിലാണ്.
വായു മലിനീകരണം രൂക്ഷമായി സാഹചര്യത്തില് ദില്ലിയില് രണ്ടുദിവസം സ്കൂളുകള്ക്ക് അവധി പ്രഖ്യാപിച്ചിരിക്കുകയാണ്. ഡല്ഹി മുഖ്യമന്ത്രി അരവിന്ദ് കെജ്രിവാളാണ് എക്സിലൂടെ അവധി പ്രഖ്യാപിച്ചത്. മലിനീകരണ തോത് ഉയര്ന്ന സാഹചര്യത്തില് എല്ലാ സര്ക്കാര്, സ്വകാര്യ പ്രൈമറി സ്കൂളുകള്ക്കും അടുത്ത 2 ദിവസം അവധിയായിരിക്കുമെന്നാണ് മുഖ്യമന്ത്രി കെജ്രിവാള് അറിയിച്ചത്.
മലിനീകരണം കുറയ്ക്കുന്നതിനായുള്ള നടപടികള് സംസ്ഥാന സര്ക്കാര് നടപ്പാക്കി തുടങ്ങിയിരുന്നു. നിര്മ്മാണ പ്രവര്ത്തനങ്ങള് നടക്കുന്നയിടങ്ങളില് എഞ്ചിനീയര്മാര് നിരന്തരം പരിശോധന നടത്തി മലിനീകരണം കുറയ്ക്കാനുള്ള നടപടികള് സ്വീകരിക്കണമെന്നും നഗരത്തില് സ്വകാര്യ വാഹനങ്ങള് ഇറക്കുന്നത് കുറയ്ക്കണമെന്നും സര്ക്കാര് അഭ്യര്ത്ഥിച്ചിച്ചിട്ടുണ്ട്.
ഇലക്ട്രിക് -സിഎന്ജി വാഹനങ്ങള് കൂടുതലായി ഉപയോഗിക്കാനും മെട്രോ സര്വീസുകളെ ആശ്രയിക്കാനും നിര്ദേശമുണ്ട്. ഹോട്ടലുകളിലടക്കം വിറകും കല്ക്കരിയും ഉപയോഗിച്ചുള്ള അടുപ്പുകള് ഉപയോഗിക്കുന്നത് നിരോധിച്ചിട്ടുണ്ട്.