വര്ക്കല: സി.എച്ച് മുഹമ്മദ് കോയ ചാരിറ്റബിള് ട്രസ്റ്റ് ജനറല് സെക്രട്ടറിയും മുസ്ലിം ലീഗ് നേതാവുമായ എ. ഹാമിദ് വേദിയില് കുഴഞ്ഞുവീണ് മരിച്ചു. ഇടവ ജവഹര് പബ്ലിക് സ്കൂളില് ഇന്ന് രാവിലെ 11 മണിയോടെയായിരുന്നു സംഭവം. വര്ഷങ്ങളായി എല്ലാത്തവണയും നടത്തിവരുന്ന സി.എച്ച് അനുസ്മരണ പരിപാടിക്കും വിദ്യാഭ്യാസ അവാര്ഡ് സമ്മാനിക്കലിനുമായാണ് ജവഹര് സ്കൂളില് വേദിയൊരുക്കിയത്. സമ്മേളനം ആരംഭിക്കുന്നതുവരെ മുഖ്യസംഘാടകനായി സജീവമായി നിന്ന ഹാമിദ് പെട്ടെന്ന് കുഴഞ്ഞുവീണത് വേദിയും സദസ്സിലുമുണ്ടായിരുന്നവര്ക്ക് തീരാവേദനയായി. പരിപാടിയില് സ്വാഗത പ്രാസംഗികനായിരുന്നു ഹാമിദ്.
ഉദ്ഘാടകനായ മുസ്ലിം ലീഗ് സംസ്ഥാന സെക്രട്ടറി പ്രൊഫ. ആബിദ് ഹുസൈന് തങ്ങളും മറ്റ് വിശിഷ്ട വ്യക്തികളും 10.45ഓടെ സ്കൂളിലെത്തി, ഹാമിദിന്റെ നേതൃത്വത്തില് കുട്ടികള് ബാന്റ് മേളത്തിന്റെ അകമ്പടിയോടെ സ്വീകരിച്ച് വേദിയിലെത്തിച്ചു. സമ്മേളനത്തിന് മുന്നോടിയായി ഈശ്വര പ്രാര്ത്ഥന നടക്കുന്നതിനിടെയാണ് തൊട്ടടുത്ത് നിന്നിരുന്ന ആബിദ് ഹുസൈന് തങ്ങളുടെ കൈയ്യില് മുറുകെ പിടിച്ച് ഹാമിദ് കസേരയിലേക്ക് ചരിഞ്ഞത്. ഉടന് തന്നെ പാരിപ്പള്ളി മെഡിക്കല് കോളജില് എത്തിച്ചെങ്കിലും മരണം സംഭവിച്ചിരുന്നു. സി.എച്ചിന്റെ വിദ്യാഭ്യാസ കാഴ്ചപ്പാടുകള് പ്രയോഗത്തില് വരുത്താന് വര്ഷങ്ങളായി പ്രവര്ത്തിച്ചുവന്ന നേതാവായിരുന്നു ഹാമിദ്. എല്ലാ വര്ഷവും ഇത്തരം പരിപാടികള് സംഘടിപ്പിക്കാന് അദ്ദേഹം മുന്കൈയെടുത്തു.
ഇടവ പഞ്ചായത്തിലെ നാല് സ്കൂളുകളില് നിന്ന് എസ്.എസ്.എല്.സിക്കും പ്ലസ് ടുവിനും ഫുള് എ പ്ലസ് വാങ്ങിയ വിദ്യാര്ത്ഥികളെ ആദരിക്കാനാണ് ചടങ്ങ് സംഘടിപ്പിച്ചത്. സി.എച്ച് ചാരിറ്റബിള് ട്രസ്റ്റ് പ്രസിഡന്റ് അഡ്വ.എ ഇഖ്ബാല്, വര്ക്കല പോക്സോ കോടതിയിലെ സ്പെഷ്യല് പ്രോസിക്യൂട്ടര് അഡ്വ.പി ഹേമചന്ദ്രന്, കോണ്ഗ്രസ് നേതാവും മുന് എം.എല്.എയുമായ വര്ക്കല കഹാര്, മുസ്ലിം ലീഗ് സംസ്ഥാന പ്രവര്ത്തക സമിതിയംഗം അഡ്വ.കണിയാപുരം ഹലീം, ജില്ലാ പഞ്ചായത്ത് മെമ്പറും സി.പി.ഐ നേതാവുമായ ഗീതാ നസീര്, ജവഹര് സ്കൂള് പ്രിന്സിപ്പല് ഫാദര് ജോഷി മായംപറമ്പില്, മുസ്ലിം ലീഗ് വര്ക്കല മണ്ഡലം വൈസ് പ്രസിഡന്റ് മുഹമ്മദ് റസാഖ് തുടങ്ങിയവര് വേദിയിലുണ്ടായിരുന്നു. ഹാമിദ് കുഴഞ്ഞുവീണതോടെ സമ്മേളനം പെട്ടെന്ന് അവസാനിപ്പിച്ചു. ജനീവയാണ് ഭാര്യ, മക്കള്: വിനോധ്, സനോജ്.
ഖബറടക്കം നാളെ രാവിലെ 10 മണിക്ക് ഇടവ മുസ്ലിം ജമാഅത്ത് ഖബര്സ്ഥാനില്