ചെന്നൈ: മലയാളി താരം സഞ്ജു സാംസണ് ചെന്നൈ സൂപ്പര് കിങ്സില് ചേര്ന്നെന്ന വാര്ത്തകളെ കൂടുതല് ശക്തമാക്കുന്നത് ടീം നല്കിയ പിറന്നാള് ആശംസ പോസ്റ്റാണ്. ‘ കൂടുതല് ഊര്ജം നിറയട്ടെ.. സൂപ്പര് ബര്ത്ത് ഡേ ആശംസകള്’ എന്ന സന്ദേശത്തോടെയാണ് ചെന്നൈ സൂപ്പര് കിങ്സ് നവംബര് 11 ന് 31-ാം പിറന്നാള് ആഘോഷിച്ച സഞ്ജുവിന് ആശംസ നേര്ന്നത്. സോഷ്യല് മീഡിയയിലുടനീളം പോസ്റ്റ് വൈറലായതോടെ ആരാധകര് ഇതിനെ ”സഞ്ജുവിന്റെ ഡീല് ഉറപ്പിച്ചു”എന്ന സൂചനയായാണ് കാണുന്നത്.
പത്തുവര്ഷത്തിലേറെയായി രാജസ്ഥാന് റോയല്സിന്റെ താരമുഖമായ സഞ്ജുവിന്റെ, ഐ.പി.എല് ചരിത്രത്തിലെ വലിയ ട്രേഡ് ഡീലുകളില് ഒന്നായി ചെന്നൈ സൂപ്പര് കിങ്സ് സ്വന്തമാക്കുന്നതായി റിപ്പോര്ട്ടുകള് സൂചിപ്പിക്കുന്നു. കൈമാറ്റ തുകയ്ക്ക് പുറമെ രവീന്ദ്ര ജദേജയും സാം കറനും രാജസ്ഥാനിലേക്ക് മാറും എന്നാണ് ‘ക്രിക്ബസ്’ റിപ്പോര്ട്ട്. ടീമുകളുടെയോ താരത്തിന്റെയോ ഭാഗത്ത് നിന്ന് ഔദ്യോഗിക പ്രഖ്യാപനം വന്നിട്ടില്ലെങ്കിലും, ചെന്നൈയുടെ ആശംസാ പോസ്റ്റ് അനൗദ്യോഗിക സ്ഥിരീകരണവുമായി ആരാധകര് വിലയിരുത്തുന്നു.
എം.എസ്. ധോണിക്ക് പിന്ഗാമിയായുള്ള നായക സ്ഥാനത്തേക്ക് സഞ്ജുവിനെ പരിഗണിക്കുന്നതായും റിപ്പോര്ട്ടുകളുണ്ട്. അടുത്ത സീസണോടെ ധോണി വിടവാങ്ങുമെന്നതും, സഞ്ജുവിന്റെ നേതൃത്വശേഷിയേയാണ് ചെന്നൈ സൂപ്പര് കിങ്സ് പ്രധാനമായി കാണുന്നതെന്നും റിപ്പോര്ട്ട് വ്യക്തമാക്കുന്നു. ഇതേ കാര്യം മുന് ഇന്ത്യന് താരം മുഹമ്മദ് കൈഫും പിന്തുണച്ചു.