ദുബൈ: ഹോപ് പ്രോബ് എന്ന ചൊവ്വാ ദൗത്യം യു.എ.ഇക്ക് സ്വപ്നനേട്ടത്തിലേക്കുള്ള ആദ്യ കാല്വയ്പ്പേ ആയിട്ടുള്ളൂ. 2117ല് ചുവന്ന ഗ്രഹത്തില് ഒരു നഗരം എന്ന യു.എ.ഇയുടെ ഡ്രീം പ്രോജക്ടിലേക്കുള്ള ആദ്യപടി. ഒരു നൂറ്റാണ്ടു കഴിഞ്ഞുള്ള ലക്ഷ്യത്തിലേക്കുള്ള വഴിത്തിരിവാണ് കഴിഞ്ഞ ദിവസത്തെ വിജയകരമായ ചൊവ്വാദൗത്യമെന്ന് അബൂദാബി സെന്റര് ഫോര് സ്പേസ് സയന്സിലെ ചീഫ് റിസര്ച്ച് സയന്റിസ്റ്റ് ദിമിത്ര അത്രി പറയുന്നു. ഗള്ഫ് മാദ്ധ്യമമായ ഖലീജ് ടൈംസുമായി സംസാരിക്കുകയായിരുന്നു അദ്ദേഹം.
‘ചൊവ്വയില് ജീവന്റെ തെളിവൊന്നും ഇതുവരെ ലഭ്യമായിട്ടില്ല. എന്നാല് ഹൈഡ്രജന് ദ്രാവകത്തിന് നിലനില്ക്കാന് കഴിയുന്ന സാന്ദ്രത കൂടിയ അന്തരീക്ഷമാണ് ചുവന്ന ഗ്രഹത്തില് ഉള്ളത്. ഗ്രഹങ്ങള്ക്ക് എങ്ങനെയാണ് അന്തരീക്ഷം നഷ്ടപ്പെടുന്നത് എന്നത് ഗ്രഹശാസ്ത്രത്തിലെ അടിസ്ഥാന ചോദ്യമാണ്. ചൊവ്വയുടെ അന്തരീക്ഷം എന്തു കൊണ്ട് ക്ഷയിക്കുന്നു എന്നതിനെ കുറിച്ച് ഹോപ് പ്രോബ് ദൗത്യം ഒരുപാട് ഉത്തരങ്ങള് തരും’- നാസയിലെ സ്ഥിരാംഗം കൂടിയായ അത്രി പറയുന്നു.