ഹൈദരാബാദ്: പരീക്ഷയില് കുറഞ്ഞ മാര്ക്ക് നേടിയതിനെ തുടര്ന്ന് മാതാപിതാക്കളുടെ ശാസനയെ തുടര്ന്ന് അസ്വസ്ഥയായ പത്താം ക്ലാസ് വിദ്യാര്ത്ഥിനി സ്കൂള് കെട്ടിടത്തിന്റെ അഞ്ചാം നിലയില് നിന്ന് ചാടി ജീവനൊടുക്കി. ചൊവ്വാഴ്ച ഹബ്സിഗുഡയിലെ കാരിയ സ്കൂളിലാണ് സംഭവം നടന്നത്.
പോലീസ് വിവരങ്ങള് പ്രകാരം, സംഭവത്തിനുശേഷം സ്ഥലത്തെത്തിയ ഉദ്യോഗസ്ഥര് മൃതദേഹം സെക്കന്ത്രാബാദ് ഗാന്ധി ആശുപത്രിയിലേക്ക് പോസ്റ്റ്മോര്ട്ടത്തിനായി മാറ്റി. സംഭവത്തില് കേസ് രജിസ്റ്റര് ചെയ്ത് പൊലീസ് അന്വേഷണം ആരംഭിച്ചു.
സംഭവത്തെക്കുറിച്ച് എഐഎംഐഎം പ്രസിഡന്റും ഹൈദരാബാദ് എംപിയുമായ അസദുദ്ദീന് ഒവൈസി ടിഎംആര്ഇഎസ് വൈസ് ചെയര്മാന് ഫഹീം ഖുറേഷിയുമായി സംസാരിച്ചു.സംഭവത്തില് സമഗ്രമായ അന്വേഷണം നടത്തണമെന്നും ഉത്തരവാദികളായവര്ക്കെതിരെ നടപടിയെടുക്കണമെന്നും അദ്ദേഹം ആവശ്യപ്പെട്ടു. കുട്ടിയുടെ കുടുംബത്തിന് സര്ക്കാര് സാമ്പത്തിക സഹായവും എല്ലാ പിന്തുണയും നല്കണമെന്നും എംപി ആവശ്യപ്പെട്ടു. കുടുംബത്തിലെ ഒരാള്ക്ക് സര്ക്കാര് ജോലി നല്കണമെന്ന് ഒവൈസി സര്ക്കാരിനോട് ആവശ്യപ്പെട്ടു.
തെലങ്കാനയില് സ്കൂള് വിദ്യാര്ത്ഥികളുടെ ആത്മഹത്യ ഇപ്പോള് ആശങ്ക ഉയര്ത്തുന്ന സാഹചര്യമാണ്. തിങ്കളാഴ്ച നിസാമാബാദ് ജില്ലയിലെ തെലങ്കാന മൈനോറിറ്റി റെസിഡന്ഷ്യല് സ്കൂളിലുണ്ടായ സമാന സംഭവത്തിന് പിന്നാലെയാണ് ഹൈദരാബാദ് കേസും റിപ്പോര്ട്ട് ചെയ്യപ്പെട്ടിരിക്കുന്നത്.