കൊച്ചി നഗരമധ്യത്തില് റോഡരികിലെ മരത്തിന് മുകളില് കുടുങ്ങിയിരുന്ന കൂറ്റന് പെരുമ്പാമ്പിനെ പിടികൂടി. പാമ്പ് മരത്തില് നിന്ന് താഴേയ്ക്ക് വീണപ്പോഴാണ് പിടികൂടിയത്. പെരുമ്പാമ്പിനെ വനംവകുപ്പിന് കൈമാറും. കോടനാട് കൊണ്ടുപോയി തുറന്നുവിടുമെന്നാണ് വിവരം.
സര്ക്കാരിന്റെ കീഴിലുളള പോസ്റ്റ് മെട്രിക് ഹോസ്റ്റല് വളപ്പിലെ മരത്തിലാണ് രാവിലെ പെരുമ്പാമ്പിനെ കണ്ടത്. മറ്റ് വഴികളില്ലാത്തതിനാല് പാമ്പ് മരത്തില് നിന്ന് താഴെയിറങ്ങുമ്പോള് പിടികൂടാനായിരുന്നു തീരുമാനം. രാവിലെ ഹോസ്റ്റല് വളപ്പില് കാക്കകളുടെ കൂട്ടക്കരച്ചില് കേട്ടാണ് റോഡിലൂടെ നടന്നുപോയവര് മരത്തിന് മുകളിലേക്ക് ശ്രദ്ധിച്ചത്. പെരുമ്പാമ്പിനെ കണ്ട വിവരമറിഞ്ഞ് എംഎല്എയും കൗണ്സിലറും പൊലീസും ഫയര്ഫോഴ്സും വനംവകുപ്പുമെല്ലാം സ്ഥലത്തെത്തിയിരുന്നു.
പാമ്പിനെ നിരീക്ഷിക്കാനായി ഒരു റസ്ക്യൂവറെയും നിയോഗിച്ചു. ഒടുവില് വൈകുന്നേരം ഏഴരയോടെ പാമ്പ് താഴെയിറങ്ങുകയും പാമ്പിനെ പിടികൂടുകയുമായിരുന്നു.