ജനങ്ങളെ ഹൃദയത്തോട് ചേർത്തുവെച്ച നേതാവ്: പി.കെ ബഷീർ എം.എൽ.എ

മലപ്പുറം: ജനങ്ങളെ ഹൃദയത്തോട് ചേർത്തുവച്ച നേതാവിനെയാണ് വി കെ ഇബ്രാഹിം കുഞ്ഞ് സാഹിബിന്റെ വിയോഗത്തിലൂടെ നഷ്ടമായതെന്ന് പി.കെ ബഷീർ എംഎൽഎ അനുസ്മരിച്ചു. എന്റെ പിതാവ് സീതി ഹാജിയും ഇബ്രാഹിം കുഞ്ഞ് സാഹിബും നല്ല ആത്മബന്ധമുള്ള കുടുംബസുഹൃത്തുക്കളായിരുന്നു.

പിതാവിന്റെ വിയോഗ ശേഷം എന്നോടും ഏറെ വാത്സല്യത്തോടെയാണ് പെരുമാറിയത്. കന്നി എം.എൽ.എയായി 2011ൽ നിയമസഭയിലെത്തിയ എനിക്ക് പിതൃതുല്യമായ പരിഗണനയോടെ എല്ലാ കാര്യങ്ങളും പറഞ്ഞുതരികയും മന്ത്രി എന്ന നിലയിൽ എന്റെ മണ്ഡലത്തിന്റെ മുഖച്ഛായ മാറ്റുന്ന പദ്ധതികൾക്ക് ഒപ്പം നിൽക്കുകയും ചെയ്തു. എന്നും പാർട്ടി പ്രവർത്തകരെ ഹൃദയത്തോട് ചേർത്തുപിടിച്ച, പാവപ്പെട്ടവരെ സഹായിക്കുന്ന ജനകീയ നേതാവായിരുന്നു അദ്ദേഹം. ഒരുപാട് മനുഷ്യരുടെ ആശ്രയമാണ് അറ്റുപോയതെന്നും അദ്ദേഹം പറഞ്ഞു.