കസ്റ്റഡിയില് നിന്ന് രക്ഷപെടാന് ശ്രമിച്ച പോക്സോ കേസ് പ്രതിയെ പൊലീസ് ഉദ്യോഗസ്ഥ വെടിവച്ച് വീഴ്ത്തി. ഗുജറാത്തിലെ ഗാന്ധിനഗറില് ശനിയാഴ്ച വൈകുന്നേരമാണ് സംഭവം.
നാല് വയസുകാരിയെ ബലാത്സംഗം ചെയ്തതിന് അറസ്റ്റിലായ റാം യാദവി (40)നെയാണ് സെക്ഷന് 21 പൊലീസ് സ്റ്റേഷന് ഇന്സ്പെക്ടര് ലതാ ദേശായി വെടിവച്ചത്. രക്ഷപെടാന് ശ്രമിച്ചതോടെ പൊലീസ് ഉദ്യോഗസ്ഥ കാലിന് വെടിവെക്കുകയായിരുന്നു. പരിക്കേറ്റ ഇയാള് ആശുപത്രിയില് ചികിത്സയിലാണ്.
ഡിസംബര് 15നാണ് കേസിനാസ്പദമായ സംഭവം. നിര്മാണത്തൊഴിലാളിയായ അമ്മയ്ക്കൊപ്പം രാത്രി ഷെഡ്ഡില് ഉറങ്ങുകയായിരുന്ന നാല് വയസുകാരിയെ യാദവ് തട്ടിക്കൊണ്ടുപോവുകയായിരുന്നു. തുടര്ന്ന് സെക്ടര് 24ലെ ഒറ്റപ്പെട്ട സ്ഥലത്തെത്തിച്ച് ബലാത്സംഗം ചെയ്ത ശേഷം ഉപേക്ഷിച്ചു.
പെണ്കുട്ടി അമ്മയോട് കാര്യങ്ങള് പറഞ്ഞതിനെ തുടര്ന്ന് ഇവര് പൊലീസില് പരാതി നല്കുകയും കേസ് രജിസ്റ്റര് ചെയ്യുകയുമായിരുന്നു. തുടര്ന്ന് പൊലീസ് നടത്തിയ തിരച്ചിലില് യാദവിനെ സെക്ടര് 25ലെ ഒരു ഗ്രാമത്തില്നിന്ന് നിന്ന് അറസ്റ്റ് ചെയ്യുകയായിരുന്നെന്ന് ലത ദേശായി പറഞ്ഞു.
ശനിയാഴ്ച വൈകുന്നേരം സംഭവസ്ഥലത്ത് തെളിവെടുപ്പിനെത്തിച്ച പ്രതി പൊലീസുകാരെ പിടിച്ചുതള്ളി ഓടി രക്ഷപെടാന് ശ്രമിക്കുകയായിരുന്നു. ഇതോടെ താന് മുന്നറിയിപ്പ് നല്കിയെങ്കിലും പ്രതി നില്ക്കാന് തയാറായില്ല. ഏകദേശം 30 അടി അകലെയായിരിക്കെ താന് മൂന്ന് റൗണ്ട് വെടിവച്ചതായും ഒരു ബുള്ളറ്റ് ഇയാളുടെ കാലില് കൊണ്ടതായും ഉദ്യോഗസ്ഥ കൂട്ടിച്ചേര്ത്തു.