ബംഗളൂരു: കലബുറഗി ജില്ലയിലെ ഗൗനഹള്ളിയില് ചൊവ്വാഴ്ച വൈകുന്നേരം നടന്ന വാഹനാപകടത്തില് മുതിര്ന്ന ഐ.എ.എസ് ഓഫീസര് മഹന്തേഷ് ബിലാഗി (51) ഉള്പ്പെടെ മൂന്ന് പേര് മരിച്ചു. കര്ണാടക സ്റ്റേറ്റ് മിനറല്സ് കോര്പറേഷന് മാനേജിങ് ഡയറക്ടറായിരുന്ന അദ്ദേഹം മുന്പ് ബെസ്കം (BESCOM) എം.ഡിയും ആയിരുന്നു.
അപകടം സംഭവിച്ചത് വിജയപുരയില് നിന്നു കലബുറഗിയിലേക്ക് വിവാഹച്ചടങ്ങില് പങ്കെടുക്കാന് പോകുന്നതിനിടെയാണ്. റോഡിലൂടെ പെട്ടെന്ന് കടന്ന തെരുവ് നായയെ ഇടിക്കാതിരിക്കാന് ഡ്രൈവര് വാഹനം വെട്ടിച്ചുവിടുമ്പോള് നിയന്ത്രണം തെറ്റി. മീഡിയനില് ഇടിച്ചുകയറിയ ഇന്നോവ കാര് തകര്ന്നതോടെ മഹന്തേഷിന്റെ സഹോദരന് ശങ്കര് ബലാജി (55), ബന്ധു ഇറാന ബിലാഗി എന്നിവര് സംഭവ സ്ഥലത്തുവെച്ച് തന്നെ മരിച്ചു.
പരിക്കേറ്റ മഹന്തേഷ് പിന്നീട് കലബുറഗിയിലെ സ്വകാര്യ ആശുപത്രിയില് വെച്ച് മരണപ്പെട്ടു. 2012 ബാച്ച് കര്ണാടക കേഡര് ഐ.എ.എസ് ഉദ്യോഗസ്ഥനായ മഹന്തേഷ് സാമ്പത്തികമായി പിന്നാക്കമായ കുടുംബത്തില് നിന്നാണ് ഉയര്ന്നത്. വീട്ടുജോലിക്കാരിയായ മാതാവിന്റെ മകനായ അദ്ദേഹം രാജ്യത്തെ ഏറ്റവും കഠിനമായ മത്സരപരീക്ഷ വിജയിച്ച് സിവില് സര്വീസിലെത്തിയത് നിരവധി പേര്ക്ക് പ്രചോദനമായിരുന്നു