മുംബൈ: യുഎഇയും ഇന്ത്യയും തമ്മിലുള്ള സാമ്പത്തിക പങ്കാളിത്തം വിപുലമാക്കുന്നതിന്റെ ഭാഗമായി അബുദാബി ഇന്വെസ്റ്റ്മെന്റ് ഫോറം മുംബൈയില് നടന്നു. അബുദാബി ഇന്വെസ്റ്റ്മെന്റ് ഓഫീസും അബുദാബി സാമ്പത്തിക വികസന വകുപ്പും ചേര്ന്ന് മുംബൈയില് സംഘടിപ്പിച്ച അബുദാബി ഇന്വെസ്റ്റ്മെന്റ് ഫോറത്തില് പൊതു, സ്വകാര്യ മേഖലകളില് നിന്നുള്ള നിരവധി മുന്നിര സ്ഥാപനങ്ങള് പങ്കാളികളായി.
അബുദാബിയെ ഗ്ലോബല് ഹബ്ബാക്കുക എന്ന അബുദാബി ഫാമിലി ബിസിനസ് കൗണ്സിലിന്റെ ശ്രമങ്ങളുടെ ഭാഗം കൂടിയായാണ് ഇന്വെസ്റ്റ്മെന്റ് ഫോറം സംഘടിപ്പിച്ചത്. നിരവധി ഇന്ത്യന് കമ്പനികള് അബുദാബിയില് വന് നിക്ഷേപങ്ങള്ക്കുള്ള തങ്ങളുടെ സന്നദ്ധത അറിയിച്ചു.
ഇന്ത്യയിലെ യുഎഇ അംബാസിഡര് ഡോ. അബ്ദുള്നാസര് അല്ഷാലി, അബുദാബി ചേംബര് ഓഫ് കൊമേഴ്സ് ആന്ഡ് ഇന്ഡസ്ട്രീസ് സെക്കന്ഡ് വൈസ് ചെയര്മാനും മാനേജിംഗ് ഡയറക്ടറുമായ ഷാമിസ് ഖല്ഫാന് അല് ദഹേരി, അബുദാബി സാമ്പത്തിക വികസന വകുപ്പ് ചെയര്മാന് അഹമദ് ജാസിം അല് സാബി, ലുലു ഗ്രൂപ്പ് ചെയര്മാന് എം.എ യൂസഫലി, യുഎഇയിലെയും ഇന്ത്യയിലെയും വ്യവസായ പ്രമുഖര് തുടങ്ങിയവര് ഫോറത്തില് പങ്കെടുത്തു. അബുദാബി ഫാമിലി ബിസിനസ് കൗണ്സില് , അബുദാബി ചേംബര് പ്രതിനിധികള് ഉള്പ്പടെ ഉന്നതതല സാമ്പത്തിക പ്രതിനിധി സംഘം ഫോറത്തില് സംബന്ധിച്ചു.
ഗ്ലോബല് ബിസിനസ് ഹബ്ബായി അബുദാബി മാറുകയാണെന്ന് ലുലു ഗ്രൂപ്പ് ചെയര്മാന് എം.എ യൂസഫലി ഇന്വെസ്റ്റ്മെന്റ് ഫോറത്തിലെ സമാപന പ്രസംഗത്തില് ചൂണ്ടികാട്ടി. ഇന്ത്യയും യുഎഇയും തമ്മില് മികച്ച സാമ്പത്തിക സഹകരണമാണ് ഉള്ളത്. ഇരുരാജ്യങ്ങളിലെയും കമ്പനികള്ക്ക് കൂടുതല് വിപണി സാധ്യതയാണുള്ളത്. മികച്ച നിക്ഷേപ പിന്തുണയാണ് ഭരണനേതൃത്വങ്ങള് നല്കി വരുന്നതെന്നും കൂടുതല് നിക്ഷേപ പദ്ധതികള് യാഥാര്ത്ഥ്യമാകണമെന്നും അദ്ദേഹം അഭിപ്രായപ്പെട്ടു.
ഇരുരാജ്യങ്ങളും തമ്മില് നിക്ഷേപ പദ്ധതികള് വിപുലമാക്കുന്നതിന് വേഗത പകരുന്ന കരാറുകളില് ഇന്ത്യയിലെയും യുഎഇയിലെയും മുന്നിര കമ്പനികള് ഒപ്പുവച്ചു. ഭക്ഷ്യസംസ്കരണം, ഫാഷന്, ഇലക്ട്രോണിക്സ്, ഐടി, ആര്ട്ടിഫിഷ്യല് ഇന്റലിജന്സ്, നിര്മ്മാണ മേഖല, ഊര്ജ്ജം, ക്ലീന് എനര്ജി, ബയോടെക്നോളജി തുടങ്ങി വിവിധരംഗങ്ങളില് മികച്ച നിക്ഷേപങ്ങള്ക്ക് ധാരണയായി.