കൊല്ലം ∙ മകൻ ഓടിച്ച കാർ അപകടത്തിൽപ്പെട്ട് പിതാവ് മരിച്ചു. കൊല്ലം കോർപറേഷൻ മുൻ കൗൺസിലർ പള്ളിമുക്ക് മേപ്പുറം കിടങ്ങ അഴിക്കകം എ.എം.അൻസാരിയാണ് (50) മരിച്ചത്. ഞായറാഴ്ച രാവിലെ ദേശീയപാതയിൽ നിയന്ത്രണംവിട്ട കാര്‍ തോട്ടപ്പള്ളി പാലത്തിന്റെ കൈവരിയിൽ ഇടിച്ചായിരുന്നു അപകടം.

മലപ്പുറത്തുനിന്ന് കൊല്ലത്തേക്ക് കുടുംബവുമായി സഞ്ചരിച്ച കാറാണ് അപകടത്തിൽപ്പെട്ടത്. മകൻ അൻവർ ആണ് കാറോടിച്ചിരുന്നത്. കാർ പാലത്തിൽ ഇടിച്ചതിനെത്തുടർന്ന് തൽക്ഷണം അൻസാരി മരിച്ചു. പരുക്കേറ്റ അൻവറിനെ വണ്ടാനം മെഡിക്കൽ കോളജ് ആശുപത്രിയിൽ പ്രവേശിപ്പിച്ചു.

ഒപ്പമുണ്ടായിരുന്ന ഭാര്യയ്ക്കും മറ്റുള്ളവർക്കും പരുക്കില്ല. 2000-2005 കാലയളവിൽ കൊല്ലം കോർപറേഷന്‍ കൗൺസിലർ ആയിരുന്നു അൻസാരി. കൊല്ലം ഡിസിസി അംഗമാണ്. കൊല്ലൂർവിള മുൻ പഞ്ചായത്തംഗവുമാണ്.