കാന്ബറയിലെ ഓസ്ട്രേലിയന് ദേശീയ പാര്ലമെന്റിലെ ‘പാര്ലമെന്ററി ഫ്രണ്ട്സ് ഓഫ് ഇന്ത്യ’ യുടെ നേതൃത്വത്തിൽ നടൻ മമ്മൂട്ടിയെ ആദരിച്ച് പേഴ്സണലൈസ്ഡ് സ്റ്റാമ്പുകള് പുറത്തിറക്കി. മമ്മൂട്ടിയുടെ മുഖമുള്ള പതിനായിരം പേഴ്സണലൈസ്ഡ് സ്റ്റാമ്പുകള് ഓസ്ട്രേലിയ ഇന്ത്യ ബിസിനസ് കൗണ്സിലിന്റെ സഹകരണത്തോടെ പുറത്തിറക്കുന്നതിന്റെ ഉദ്ഘാടനം പാര്ലമന്റ് ഹൗസ് ഹാളില് നടന്നു.
ആദ്യ സ്റ്റാമ്പ് ഓസ്ട്രേലിയയിലെ ഇന്ത്യന് ഹൈക്കമ്മീഷണര് മന്പ്രീത് വോറയ്ക്കു കൈമാറി പ്രധാനമന്ത്രി ആന്റണി ആല്ബനീസിയുടെ പ്രതിനിധിയും പാര്ലമെന്ററി ഫ്രണ്ട്സ് ഓഫ് ഇന്ത്യയുടെ ചെയര്മാന് ഡോ ആന്ഡ്രൂ ചാള്ട്ടന് എം.പി പ്രകാശനം ചെയ്തു.ഓസ്ട്രേലിയയിലെ നിരവധി എം.പി മാര്, സെനറ്റ് അംഗങ്ങള്, ഹൈക്കമ്മീഷണര് ഓഫീസ് ഉദ്യോഗസ്ഥര്, ആസ്ട്രേലിയയിലെ വിവിധ ഇന്ത്യന് സാംസ്കാരിക സംഘടനകളുടെ പ്രതിനിധികള് തുടങ്ങി നൂറ്റി അന്പതോളം പേര് ചടങ്ങില് പങ്കെടുത്തു. ഓസ്ട്രേലിയന് തപാല് വകുപ്പിന്റെ പേഴ്സണലൈസ്ഡ് വിഭാഗത്തിലൂടെ പുറത്തിറക്കുന്ന സ്റ്റാമ്പുകള് ഇന്ന് മുതല് വിപണിയിലെത്തും.