ഉച്ചയ്‌ക്കുശേഷം സ്വർണവിലയിൽ ഇടിവ്

കോഴിക്കോട്: രാവിലെ കുത്തനെ ഉയര്‍ന്ന സ്വര്‍ണവില ഉച്ചയോടെ ഇടിവ് രേഖപ്പെടുത്തി. ആഗോള വിപണിയിലെ വര്‍ധനയെ തുടര്‍ന്ന് രാവിലെ ഗ്രാമിന് 190 രൂപ കൂടി 14,760 രൂപയായും, പവന് 1,520 രൂപ ഉയര്‍ന്ന് 1,18,320 രൂപയായും വില എത്തിയിരുന്നു. എന്നാല്‍ ഉച്ചയോടെ ഗ്രാമിന് 100 രൂപ കുറഞ്ഞ് 14,660 രൂപയും, പവന് 800 രൂപ താഴ്ന്ന് 1,17,520 രൂപയുമായി.

യു.എസ് പ്രസിഡന്റ് ഡൊണാള്‍ഡ് ട്രംപ് പ്രഖ്യാപിച്ച പുതിയ തീരുവ നടപടികളും പശ്ചിമേഷ്യയിലെ സംഘര്‍ഷാവസ്ഥയും രാവിലെയുണ്ടായ കുതിപ്പിന് കാരണമായി. തുടര്‍ന്ന് ലാഭമെടുപ്പിനിടെ വില താഴ്ന്നു.

ആഗോള വിപണിയില്‍ സ്വര്‍ണം ട്രോയ് ഔണ്‍സിന് 40 ഡോളര്‍ ഉയര്‍ന്ന് 5,147.63 ഡോളറിലെത്തി. ഒരു ഘട്ടത്തില്‍ 5,125 ഡോളര്‍ വരെ താഴ്ന്നിരുന്നു. വെള്ളി 2.55 ശതമാനം ഉയര്‍ന്ന് ട്രോയ് ഔണ്‍സിന് 86.74 ഡോളറായി. ആഗോള വിലവര്‍ധനയുടെ അടിസ്ഥാനത്തില്‍ സ്വര്‍ണം, വെള്ളി ഇ.ടി.എഫ് നിക്ഷേപങ്ങളിലും മുന്നേറ്റമുണ്ടായി.