ന്യൂഡല്ഹി: ഡല്ഹിയില് അന്തരീക്ഷ മലിനീകരണം വാര്ധിക്കുന്ന സാഹചര്യത്തില് ഹോട്ടലുകളില് കല്ക്കരിക്കും വിറകിനും നിരോധനം ഏര്പ്പെടുത്തി. തുറസ്സായ സ്ഥലങ്ങളില് മാലിന്യം കത്തിക്കുന്നത് പൂര്ണ്ണമായും നിരോധിക്കാന് നിര്ദേശം നല്കി ഡല്ഹി മുഖ്യമന്ത്രി രേഖ ഗുപ്ത.
കൂടാതെ, മാലിന്യം കത്തിക്കുന്ന ആരില് നിന്നും 5,000 രൂപ വരെ പിഴ ഈടാക്കുമെന്നും മുഖ്യമന്ത്രി അറിയിച്ചു. കല്ക്കരിയും വിറകും ഉപയോഗിക്കുന്നത് ഉടനടി നിര്ത്തലാക്കാനും പരിശോധനകള് നടത്താനും നഗരത്തിലെ തദ്ദേശ സ്ഥാപനങ്ങള്ക്കും നിര്ദ്ദേശം നല്കിയിട്ടുണ്ട്.
നഗരത്തിലെ മോശം വായുഗുണനിലവാരം ആരോഗ്യപരമായ ആശങ്കകള് ഉയര്ത്തുന്ന സാഹചര്യത്തിലാണ് നടപടികള്. കഴിഞ്ഞ കുറച്ച് ദിവസങ്ങളായി നഗരത്തിലെ എയര് ക്വാളിറ്റി ഇന്ഡക്സ് (എക്യുഐ) ‘വളരെ മോശം’ വിഭാഗത്തില് തുടരുകയായിരുന്നു. എന്നാല്, കേന്ദ്ര മലിനീകരണ നിയന്ത്രണ ബോര്ഡിന്റെ കണക്കനുസരിച്ച് ചൊവ്വാഴ്ച എക്യുഐ. അല്പ്പം മെച്ചപ്പെട്ടെങ്കിലും ബുധനാഴ്ച രാവിലെ ഡല്ഹിയിലുടനീളം ഉയര്ന്ന എക്യുഐ. റീഡിങുകളാണ് രേഖപ്പെടുത്തിയത്.