സംസ്ഥാനത്ത് ഒരാള്ക്ക് കൂടി അമീബിക് മസ്തിഷ്കജ്വരം സ്ഥിരീകരിച്ചു. തിരുവനന്തപുരം പോത്തന്കോട് സ്വദേശിയായ വയോധികയ്ക്കാണ് രോഗം സ്ഥിരീകരിച്ചത്. ഇവരെ തിരുവനന്തപുരം മെഡിക്കല് കോളജ് ആശുപത്രിയില് തീവ്രപരിചരണ വിഭാഗത്തില് പ്രവേശിപ്പിച്ചു. ദിവസങ്ങള്ക്കു മുന്പ് വയോധിക പനിയെ തുടര്ന്ന് പോത്തന്കോട് സ്വകാര്യ ആശുപത്രിയില് ചികിത്സ തേടിയിരുന്നു. രോഗം മൂര്ഛിച്ചതിനെ തുടര്ന്ന് എസ്യുടി ആശുപത്രിയിലേക്കു മാറ്റുകയും തുടര്ന്ന് നടത്തിയ പരിശോധനയില് രോഗം സ്ഥിരീകരിക്കുകയുമായിരുന്നു. വൃക്കകള് തകരാറിലായതോടെ ഡയലാസിസ് നടത്തുകയും ചെയ്തു. ഇവരുടെ വീട്ടിലെ കിണറ്റിലെ വെള്ളത്തിന്റെ സാംപിള് ആരോഗ്യവകുപ്പ് പരിശോധിക്കും.