കോഴിക്കോട്: പോക്സോ വകുപ്പുകള് ഉള്പ്പെടെ ഗുരുതരമായ ആരോപണങ്ങള് നേരിടുന്ന ബിജെപി എംപി ബ്രിജ് ഭ്രൂഷനെ അറസ്റ്റ് ചെയ്യുക എന്നാവശ്യപ്പെട്ട് ഇരകളായ ഗുസ്തി താരങ്ങള്ക്ക് ഐക്യദാര്ഢ്യവുമായി മുസ്ലിം യൂത്ത് ലീഗ് ഐക്യദാര്ഢ്യ സദസ്സ് സംഘടിപ്പിക്കും. ജൂണ് 7ന് ബുധനാഴ്ച വൈകീട്ട് 4.30ന് കോഴിക്കോട് കള്ച്ചറല് ബീച്ചില് നടക്കുന്ന ഐക്യദാര്ഢ്യ സദസ്സില് പ്രമുഖ സിനിമ നടന് അബു സലീമും ദേശീയ ഫുട്ബോള് താരം മുഹമ്മദ് റാഫിയും പങ്കെടുക്കുമെന്ന് മുസ്ലിം യൂത്ത് ലീഗ് സംസ്ഥാന ജനറല് സെക്രട്ടറി പികെ ഫിറോസ് അറിയിച്ചു. ഐക്യദാര്ഢ്യവുമായി പ്രദര്ശന ഗുസ്തി മത്സരവും സംഘടിപ്പിക്കും.
കൊലപാതകങ്ങള് ഉള്പ്പെടെ ഒട്ടേറെ കേസുകളുടെ ഭാഗമായ ഒരു ഗുണ്ടാ നേതാവ് കൂടിയായ ബ്രിജ് ഭൂഷണെ സംരക്ഷിക്കുകയും ലോക ചാമ്പ്യന്ഷിപ്പുകളില് മെഡലുകള് നേടി രാജ്യത്തിന്റെ അഭിമാനം പലതവണ ഉയര്ത്തിയ ഗുസ്തി താരങ്ങളുടെ അത്യന്തം ഗൗരവതരമായ പരാതികള് കണ്ടഭാവം പോലും നടിക്കാത്ത സമീപനം കാണിക്കുകയുമാണ് കേന്ദ്രസര്ക്കാര് ചെയ്തതെന്ന് ഫിറോസ് പറഞ്ഞു.
വേട്ടയാടപ്പെട്ട കായിക താരങ്ങള്ക്ക് ഐക്യദാര്ഢ്യം പ്രഖ്യാപിച്ചു നടത്തുന്ന പ്രദര്ശന ഗുസ്തി മത്സരത്തില് കായിക താരങ്ങളും സമരത്തോട് ഐക്യദാര്ഢ്യം പുലര്ത്തുന്നവരും പങ്കാളികളാകും.