ജയ്പൂര്: സ്റ്റിയറിംഗ് വീലില് ടിഫിന് ബോക്സ് വച്ച് ഭക്ഷണം കഴിച്ചും അര്ധനഗ്നനായി ബസ് ഓടിച്ചും നടത്തിയ ഗുരുതര അശ്രദ്ധയുടെ ദൃശ്യങ്ങള് സോഷ്യല് മീഡിയയില് വൈറലായതിനെ തുടര്ന്ന് രാജസ്ഥാന് റോഡ്വേസ് ഡ്രൈവര് പരസ്മല് സസ്പെന്ഷനില്. വെള്ള ഷോര്ട്ട്സ് മാത്രം ധരിച്ച് ബസ് ഓടിക്കുന്നതും യാത്രക്കാരുടെ സുരക്ഷ പൂര്ണ്ണമായും അവഗണിച്ചതുമാണ് ദൃശ്യങ്ങളില് വ്യക്തമായത്. അജ്മീറില് നിന്നും കോട്ടയിലേക്ക് നിരവധി സ്ത്രീകളും കുട്ടികളും ഉള്പ്പെടെ യാത്രക്കാരുമായി പോയ ബസിലായിരുന്നു സംഭവം. സ്റ്റിയറിംഗില് വെച്ചിരുന്ന ടിഫിന് ബോക്സില് നിന്ന് ഭക്ഷണം കഴിക്കുകയും ബസ് അശ്രദ്ധമായി നിയന്ത്രിക്കയും ചെയ്യുന്നതാണ് വീഡിയോയില് രേഖപ്പെടുത്തിയത്. ആദ്യം ഷര്ട്ടും പൈജാമയും ധരിച്ചിരുന്നെങ്കിലും പിന്നീട് രണ്ടും ഊരിമാറ്റി ഷോര്ട്ട്സ് മാത്രം ധരിച്ചാണ് അദ്ദേഹം വാഹനം ഓടിച്ചത്. ബസില് ഉച്ചത്തില് ബോളിവുഡ് ഗാനം പ്ലേ ചെയ്തുകൊണ്ടിരുന്നതും യാത്രക്കാര് ചൂണ്ടിക്കാട്ടി. ഡ്രൈവര് പതിവായി അനാചാരമായ രീതിയില് വസ്ത്രം ധരിക്കാറുണ്ടെന്നും അനുചിതമായി പെരുമാറാറുണ്ടെന്നും യാത്രക്കാരാണ് അധികാരികളെ അറിയിച്ചത്. വീഡിയോയുമായി ബന്ധപ്പെട്ട അന്വേഷണം ആരംഭിച്ചിരിക്കുകയാണ്. യൂണിഫോം ധരിക്കാത്തതും നിരുത്തരവാദപരമായ പെരുമാറ്റവുമാണ് സസ്പെന്ഷനിലേക്ക് നയിച്ചതെന്ന് അധികൃതര് അറിയിച്ചു. അജ്മേരു ഡിപ്പോയിലായിരുന്നു പരസ്മല് ഡെപ്യൂട്ടേഷന്. യഥാര്ത്ഥ നിയമനം പ്രതാപ്ഗഡ് ഡിപ്പോയിലാണ്. വിഷയത്തില് നടപടിയെടുക്കാന് പ്രതാപ്ഗഡ് ഡിപ്പോ മാനേജര്ക്ക് കത്ത് അയച്ചിട്ടുണ്ടെന്നും ഡ്രൈവറെ സസ്പെന്ഡ് ചെയ്തിട്ടുണ്ടെന്നും അജ്മേര് ഡിപ്പോ ചീഫ് മാനേജര് രവി ശര്മ് അറിയിച്ചു.