പത്തനംതിട്ട: വടശ്ശേരിക്കരയില് 95 കാരിയായ വയോധികയെ പീഡിപ്പിക്കാന് ശ്രമിച്ച സംഭവത്തില് അയല്വാസി പത്രോസ് ജോണ് (68)നെ പെരുനാട് പൊലീസ് അറസ്റ്റ് ചെയ്തു. കഴിഞ്ഞ ദിവസം പട്ടാപ്പകല് നടന്ന സംഭവത്തില്, വീട്ടുമുറ്റത്ത് ഇരുന്നിരുന്ന വയോധികയെ പ്രതി ബലം പ്രയോഗിച്ച് കീഴ്പ്പെടുത്തുകയായിരുന്നു. പീഡനശ്രമത്തിനിടെ വയോധികയുടെ വായില് പ്രതി തുണി നിറച്ചു തിരികെ അകത്തേക്ക് തള്ളാന് ശ്രമിച്ചുവെന്നാണ് പൊലീസ്. മല്പ്പിടുത്തത്തിനിടെ തുണി വായില് നിന്ന് മാറിയതോടെ വയോധിക നിലവിളിച്ചു. നിലവിളി കേട്ട് നാട്ടുകാര് ഓടിയെത്തി പ്രതിയെ തടഞ്ഞ് വയോധികയെ രക്ഷപ്പെടുത്തി. കൂടാതെ, സംഭവം നടക്കുമ്പോള് മദ്യലഹരിയിലായിരുന്നുവെന്ന് നാട്ടുകാര് പറയുന്നു. വീട്ടില് വയോധികയും മകളും മാത്രമാണ് താമസിക്കുന്നത്. മകള് ജോലിക്ക് പോയ സമയത്താണ് ആക്രമണം നടന്നത്. പിന്നീട് നാട്ടുകാരുടെ സഹായത്തോടെ പ്രതിയെ പൊലീസില് ഏല്പ്പിക്കുകയായിരുന്നു.