സ്കാം കോളുകള് വരുന്നതിനിടെ ബാങ്കിംഗ് ആപ്പുകള് തുറക്കാന് ശ്രമിച്ചാല് ഇനി ആന്ഡ്രോയിഡ് ഫോണുകള് ഉപയോക്താവിന് തത്സമയം മുന്നറിയിപ്പ് നല്കും. സൈബര് തട്ടിപ്പുകള്ക്കെതിരായ പ്രതിരോധം കൂടുതല് ശക്തവും സുരക്ഷിതവുമായ രൂപത്തില് മാറ്റുന്നതിനായി ‘ഇന്കാള് സ്കാം പ്രൊട്ടക്ഷന്’ (In-call scam protection) എന്ന പുതിയ സുരക്ഷാ ഫീച്ചറാണ് ഗൂഗിള് അവതരിപ്പിച്ചിരിക്കുന്നത്. സാധാരണയായി ബാങ്കില് നിന്നാണെന്ന വ്യാജേന ആളുകളെ വിളിച്ച്, കോള് ഡിസ്കണക്ട് ചെയ്യാതെ തന്നെ പണം കൈമാറാന് ആവശ്യപ്പെടുന്നതാണ് സൈബര് തട്ടിപ്പുകാരുടെ പ്രധാന രീതി.
ഇത്തരം തട്ടിപ്പുകള് ഫലപ്രദമായി തടയുന്നതാണ് ഗൂഗിളിന്റെ പുതിയ സംവിധാനം. ഫോണില് സേവ് ചെയ്യാത്ത നമ്പറില് നിന്ന് കോള് വരുമ്പോള് ബാങ്കിംഗ് ആപ്പ് തുറക്കാന് ശ്രമിച്ചാല് ഉടന് തന്നെ സ്ക്രീനില് മുന്നറിയിപ്പ് പ്രത്യക്ഷപ്പെടും. ഉപയോക്താവിന് ഉടന് കോള് കട്ട് ചെയ്യുകയോ സ്ക്രീന് ഷെയറിംഗ് ബ്ലോക്ക് ചെയ്യുകയോ ചെയ്യാന് സാധിക്കും. കോള് തുടരുകയാണെങ്കില് ഫോണില് 30 സെക്കന്ഡ് നേരത്തേക്ക് പ്രവര്ത്തനത്തില് തടസ്സം നേരിടും. ഇത് ഒരു അപകട മുന്നറിയിപ്പായി കണ്ട് ഉപയോക്താക്കള്ക്ക് ഇടപാടില് നിന്ന് പിന്മാറാനും സാധിക്കും. പണം നഷ്ടപ്പെട്ടതിന് ശേഷമാണ് പല ഉപയോക്താക്കളും തട്ടിപ്പിനെ കുറിച്ച് തിരിച്ചറിയുന്നതെന്ന സാഹചര്യത്തില്, ഈ ഫീച്ചര് ഏറെ ഗുണകരമാവുമെന്നാണ് വിലയിരുത്തല്.
ആന്ഡ്രോയിഡ് 11ലും അതിനുമുകളിലുമുള്ള ഫോണുകളിലാണ് ഈ സുരക്ഷാ സംവിധാനം ലഭ്യമാകുക. സ്ക്രീന്ഷെയറിംഗ് തട്ടിപ്പുകള് ചെറുക്കുന്നതിനായി ഗൂഗിള് പേ, നവി, പേടിഎം തുടങ്ങി വിവിധ ആപ്ലിക്കേഷനുകളുമായി സഹകരിച്ച് ഇന്ത്യയില് ഒരു പുതിയ ഫീച്ചര് പരീക്ഷണാടിസ്ഥാനത്തില് അവതരിപ്പിക്കുമെന്നും ഗൂഗിള് അടുത്തിടെ ഒരു ബ്ലോഗ് പോസ്റ്റിലൂടെ അറിയിച്ചിരുന്നു. യു.കെ പോലുള്ള രാജ്യങ്ങളില് ഈ സംവിധാനം പരീക്ഷിക്കുകയും വിജയിക്കുകയും ചെയ്തതിന്റെ അടിസ്ഥാനത്തിലാണ് ഇന്ത്യയിലും ഇത് നടപ്പിലാക്കാന് കമ്പനി തീരുമാനിച്ചത്.