തിരുവനന്തപുരം: 2026 ടി20 ലോകകപ്പില് ഇന്ത്യയെ കിരീടവിജയത്തിലേക്ക് നയിച്ച മിന്നും പ്രകടനത്തിന് ശേഷം മലയാളി താരം സഞ്ജു സാംസണ് ജന്മനാട്ടിലെത്തി. തിരുവനന്തപുരം അന്താരാഷ്ട്ര വിമാനത്താവളത്തില് ഭാര്യ ചാരുലതയ്ക്കൊപ്പമെത്തിയ സഞ്ജുവിന് വന് സ്വീകരണമാണ് ലഭിച്ചത്. മന്ത്രി വി. ശിവന്കുട്ടി, എ.എ. റഹീം എം.പി എന്നിവര് ചേര്ന്ന് താരത്തെ പൊന്നാട അണിയിച്ച് സ്വീകരിച്ചു.
ഇന്ത്യയുടെ മൂന്നാം ടി20 ലോകകപ്പ് കിരീടനേട്ടത്തില് നിര്ണ്ണായക പങ്കുവഹിച്ച താരമാണ് സഞ്ജു സാംസണ്. ന്യൂസിലന്ഡിനെതിരെയുള്ള ഫൈനലില് സഞ്ജുവിന്റെ ബാറ്റിംഗ് മികവാണ് ഇന്ത്യയെ കൂറ്റന് സ്കോറിലേക്ക് എത്തിച്ചത്. ഒരു ലോകകപ്പ് പതിപ്പില് ഇന്ത്യക്കായി ഏറ്റവും കൂടുതല് റണ്സ് നേടുന്ന താരം എന്ന വിരാട് കോഹ്ലിയുടെ റെക്കോര്ഡ് അങ്ങനെ സഞ്ജു സ്വന്തമാക്കി. ന്യൂസിലന്ഡിനെ 96 റണ്സിന് തോല്പ്പിച്ചാണ് ഇന്ത്യ കിരീടം നിലനിര്ത്തിയത്. ടി20 ലോകകപ്പ് നിലനിര്ത്തുന്ന ആദ്യ ടീമെന്ന റെക്കോര്ഡും ഇന്ത്യ ഇതോടെ സ്വന്തമാക്കിക്കഴിഞ്ഞു.