ന്യൂഡല്ഹി: സിബിഎസ്ഇ 12-ാം ക്ലാസ് ബോര്ഡ് പരീക്ഷകളുടെ മൂല്യനിര്ണയത്തില് 2026 മുതല് വലിയ മാറ്റം വരുന്നു. ഉത്തരക്കടലാസുകള് ഡിജിറ്റലായി പരിശോധിക്കുന്ന ‘ഓണ്-സ്ക്രീന് മാര്ക്കിങ്’ (OSM) സംവിധാനം നടപ്പാക്കുമെന്ന് അധികൃതര് അറിയിച്ചു. ഇത് മൂല്യനിര്ണയത്തിലെ സുതാര്യത വര്ധിപ്പിക്കുകയും ഫലപ്രഖ്യാപനം വേഗത്തിലാക്കുകയും, മാര്ക്ക് കൂട്ടുമ്പോഴുണ്ടാകുന്ന മനുഷ്യ പിശകുകള് ഒഴിവാക്കുകയും ചെയ്യുമെന്ന് സിബിഎസ്ഇ വ്യക്തമാക്കിയിട്ടുണ്ട്.
പുതിയ സംവിധാനത്തില് അധ്യാപകര് പേപ്പര് മറുപടികളില്ലാതെ, അവയുടെ സ്കാന് ചെയ്ത പകര്പ്പുകള് കമ്പ്യൂട്ടര് സ്ക്രീനില് പരിശോധിച്ച് മാര്ക്ക് ഇടുന്നതാണ്. ഫലം പ്രഖ്യാപിച്ചതിനുശേഷമുള്ള മാര്ക്ക് വെരിഫിക്കേഷന് നടപടികളും ഇനി വേണ്ടതില്ല. പത്താം ക്ലാസ് പരീക്ഷകള്ക്ക് നിലവിലെ മൂല്യനിര്ണയ രീതിയാണ് തുടരുമെന്ന് സിബിഎസ്ഇ അറിയിച്ചു. പുതിയ സംവിധാനം 2026 മുതല് പന്ത്രണ്ടാം ക്ലാസ് പരീക്ഷകള്ക്ക് മാത്രമായി ബാധകമാകും. അധ്യാപകര്ക്ക് സ്കൂളില് നിന്നു തന്നെ മൂല്യനിര്ണയം നടത്താന് സാധിക്കുന്നത്, യാത്രാസമയം ലാഭിക്കാനും ക്ലാസ് സമയത്ത് പഠനപ്രവര്ത്തനങ്ങളില് കൂടുതല് ശ്രദ്ധ കേന്ദ്രീകരിക്കാനും സഹായിക്കും.
സ്കൂളുകള്ക്ക് പുതിയ സംവിധാനത്തിന് വേണ്ട കമ്പ്യൂട്ടര് ലാബ് സൗകര്യങ്ങള് ഒരുക്കണമെന്നും, കുറഞ്ഞത് 4GB റാം, Windows 8-നു മുകളില് ഓപ്പറേറ്റിംഗ് സിസ്റ്റം, മികച്ച ഇന്റര്നെറ്റ് കണക്റ്റിവിറ്റി എന്നിവ നിര്ബന്ധമാണെന്നും സിബിഎസ്ഇ വ്യക്തമാക്കിയിട്ടുണ്ട്. അധ്യാപകരെ പുതിയ സംവിധാനവുമായി പരിചയപ്പെടുത്താന് പ്രത്യേക പരിശീലന പരിപാടികളും വീഡിയോകളും ഒരുക്കും. പരീക്ഷണാടിസ്ഥാനത്തിലുള്ള ഡ്രൈ റണ്ണുകളും, സാങ്കേതിക പ്രശ്നങ്ങള് പരിഹരിക്കാന് കോള് സെന്ററുകളും പ്രവര്ത്തനക്ഷമമാക്കുമെന്നും അധികൃതര് അറിയിച്ചു.