തിരുവനന്തപുരം: നിയമസഭാ സെക്രട്ടേറിയറ്റില് നൂറിലധികം പേര്ക്ക് കോവിഡ് സ്ഥിരീകരിച്ചു. ലെജിസ്ലേച്ചര് സെക്രട്ടേറിയറ്റ് അസോസിയേഷന് നിയമസഭാ സെക്രട്ടറിക്ക് നല്കിയ കത്തിലാണ് ഇക്കാര്യം വ്യക്തമാക്കുന്നത്.
പതിനഞ്ചാം കേരള നിയമസഭയുടെ രണ്ടാം സമ്മേളനത്തിനു ശേഷമാണ് സെക്രട്ടേറിയറ്റ് ജീവനക്കാരില് കോവിഡ് പടര്ന്നു പിടിക്കുന്ന ഗുരുതര സ്ഥിതിവിശേഷം ഉണ്ടായത്. രോഗബാധ റിപ്പോര്ട്ട് ചെയ്തു തുടങ്ങിയപ്പോള് തന്നെ ഈ കാര്യം അധികൃതരുടെ ശ്രദ്ധയില്പ്പെടുത്തിയിരുന്നു. എന്നാല് ഇക്കാര്യത്തില് വേണ്ടത്ര നടപടി സ്വീകരിക്കാതിരുന്നതാണ് നൂറിലധികം പേര്ക്ക് രോഗം വരാനും ജിവനക്കാരുടെ കുടുംബാംഗങ്ങള്ക്ക് രോഗം പകരാന് കാരണമായതെന്നും ഇവര് ചൂണ്ടിക്കാണിക്കുന്നു.
ജീവനക്കാരുടെയും കുടുംബാംഗങ്ങളുടെയും സുരക്ഷയെ മുന്നിര്ത്തി രോഗ നിയന്ത്രണത്തിന് അടിയന്തര നടപടികള് സ്വീകരിക്കേണ്ടത് അത്യാവശ്യമാണ്. കോവിഡ് പടരുന്ന സാഹചര്യത്തില് സഭാ സമിതി യോഗങ്ങള് ഉള്പ്പെടെയുള്ളവ ഒഴിവാക്കി കൊണ്ട് അടുത്ത രണ്ട് ആഴ്ചത്തേക്ക് നിയമസഭ സെക്രട്ടേറിയറ്റില് അടിയന്തര കോവിഡ് നിയന്ത്രണ നടപടികള് സ്വീകരിക്കണമെന്നാണ് അസോസിയേഷന് നിയമസഭാ സെക്രട്ടറിയോട് ആവശ്യപ്പെടുന്നത്.