തിരഞ്ഞെടുപ്പ് തോല്വിക്ക് പിന്നാലെ സിപിഎമ്മില് ആഭ്യന്തര കലഹം രൂക്ഷം. ഇതിനു പിന്നാലെ നേതൃമാറ്റത്തിനായുള്ള ആവശ്യങ്ങളും പാര്ട്ടിക്കുള്ളില് ശക്തമാകുന്നു. തിരുവനന്തപുരം, പാലക്കാട് ജില്ലാ കമ്മിറ്റികളില് പാര്ട്ടിയിലെ മുതിര്ന്ന നേതാക്കള്ക്കെതിരെ കടുത്ത വിമര്ശനമാണ് ഉയരുന്നത്. സംസ്ഥാന സെക്രട്ടറി എം.വി. ഗോവിന്ദന് പാര്ട്ടി സെക്രട്ടറി സ്ഥാനം ഒഴിയണമെന്ന ആവശ്യം യോഗങ്ങളില് ശക്തമാകുന്നുണ്ട്.
തിരഞ്ഞെടുപ്പ് അവലോകനത്തിനായി വിളിച്ചുചേര്ത്ത തിരുവനന്തപുരം ജില്ലാ കമ്മിറ്റി യോഗത്തിലാണ് മുന് മുഖ്യമന്ത്രി പിണറായി വിജയനും പാര്ട്ടി സംസ്ഥാന സെക്രട്ടറി എം.വി. ഗോവിന്ദനുമെതിരെ കടുത്ത വിമര്ശനം ഉയര്ന്നത്. എം.വി. ഗോവിന്ദന് സെക്രട്ടറി സ്ഥാനത്തുനിന്ന് മാറിനില്ക്കണമെന്ന് യോഗത്തില് പരസ്യമായി ആവശ്യപ്പെട്ടു. നേതൃത്വത്തിന്റെ വീഴ്ചകളും പെരുമാറ്റ ശൈലിയിലെ പോരായ്മകളും നേതാക്കള് യോഗത്തില് തുറന്നുകാട്ടി.
പാലക്കാട് മണ്ഡലത്തില് സിപിഎം പ്രവര്ത്തനം പൂര്ണ്ണമായും നിര്ജീവമായെന്നും ഇത് ബിജെപിയുടെ വളര്ച്ചയ്ക്ക് വഴിവെച്ചെന്നും വിമര്ശനം ഉയര്ന്നു.
തളിപ്പറമ്പ് മണ്ഡലത്തില് പി.കെ. ശ്യാമളയെ സ്ഥാനാര്ത്ഥിയാക്കിയതില് വലിയ വീഴ്ച പറ്റിയെന്ന് റിപ്പോര്ട്ടില് പാര്ട്ടി ഏറ്റുപറഞ്ഞു. എസ്എന്ഡിപി യോഗം ജനറല് സെക്രട്ടറി വെള്ളാപ്പള്ളി നടേശന്റെ വര്ഗീയ പരമാര്ശങ്ങളെ കൃത്യസമയത്ത് തള്ളി പറയാത്തതും റിപ്പോര്ട്ടില് സമ്മതിക്കുന്നുണ്ട്.
അതേസമയം സ്വര്ണ്ണക്കൊള്ളക്കേസുമായി ബന്ധപ്പെട്ട് ആരോപണവിധേയനായ എ. പത്മകുമാറിനെതിരെ കര്ശന നടപടിയെടുക്കാന് തീരുമാനിച്ചു.