തിരുവനന്തപുരം: അന്താരാഷ്ട്ര വനിതാ ട്വന്റി20 ക്രിക്കറ്റില് ഏറ്റവും കൂടുതല് വിക്കറ്റുകള് നേടുന്ന താരമായി ഇന്ത്യയുടെ ദീപ്തി ശര്മ. ശ്രീലങ്കയ്ക്കെതിരായ പരമ്പരയിലെ അഞ്ചാം ടി20 മത്സരത്തിനിടെയാണ് ദീപ്തി ഈ അപൂര്വ നേട്ടം കൈവരിച്ചത്. 152 വിക്കറ്റുകളോടെ ഇന്ത്യന് സ്പിന്നര് മേഘന് ഷട്ടിന്റെ റെക്കോര്ഡ് ദീപ്തി മറികടന്നു. മത്സരത്തിന് ഇറങ്ങുമ്പോള് മേഘന്റെ റെക്കോര്ഡിനൊപ്പമായിരുന്ന ദീപ്തി, നിലാക്ഷിക സില്വയെ പുറത്താക്കിയതോടെയാണ് ചരിത്ര നേട്ടം സ്വന്തമാക്കിയത്. 130 ഇന്നിംഗ്സുകളിലാണ് ദീപ്തി 152 വിക്കറ്റിലെത്തിയത്.
അതേസമയം, വനിതാ ടി20യില് ഇന്ത്യക്കായി ഏറ്റവും കൂടുതല് വിക്കറ്റുകള് നേടിയവരുടെ പട്ടികയില് രാധാ യാദവാണ് രണ്ടാം സ്ഥാനത്ത്. 86 ഇന്നിംഗ്സുകളില് നിന്ന് 103 വിക്കറ്റുകളാണ് രാധയുടെ നേട്ടം. ശ്രീലങ്കയ്ക്കെതിരായ ടി20 പരമ്പര ഇന്ത്യ തൂത്തുവാരുകയും ചെയ്തു. കാര്യവട്ടം ഗ്രീന്ഫീല്ഡ് സ്റ്റേഡിയത്തില് നടന്ന അവസാന മത്സരത്തില് ഇന്ത്യ 15 റണ്സിന് ജയം നേടി. ടോസ് നഷ്ടപ്പെട്ട് ബാറ്റിംഗിന് ഇറങ്ങിയ ഇന്ത്യ 20 ഓവറില് ഏഴ് വിക്കറ്റ് നഷ്ടത്തില് 175 റണ്സെടുത്തു. 43 പന്തില് 68 റണ്സ് നേടിയ ഹര്മന്പ്രീത് കൗറാണ് ഇന്ത്യയുടെ ടോപ് സ്കോറര്. അമന്ജോത് കൗര് (18 പന്തില് 21)യും അരുന്ധതി റെഡ്ഡി (11 പന്തില് 27)യും മികച്ച പിന്തുണ നല്കി.
176 റണ്സ് വിജയലക്ഷ്യവുമായി മറുപടി ബാറ്റിംഗിനിറങ്ങിയ ശ്രീലങ്കയ്ക്ക് തുടക്കത്തില് തന്നെ ക്യാപ്റ്റന് ചമാരി അട്ടപ്പട്ടുവിനെ നഷ്ടമായി. തുടര്ന്ന് ഇമേഷ ദുലാനിയും ഹാസിനി പെരേരയും ചേര്ന്ന് സ്കോര് ഉയര്ത്തിയെങ്കിലും അമന് ജ്യോത് ഇമേഷയെ പുറത്താക്കി ഇന്ത്യക്ക് ബ്രേക്ക് ത്രൂ നല്കി. ഹാസിനി പെരേര അര്ധ സെഞ്ച്വറി നേടിയെങ്കിലും ശ്രീലങ്ക നിശ്ചിത 20 ഓവറില് ഏഴ് വിക്കറ്റ് നഷ്ടത്തില് 160 റണ്സില് ഒതുങ്ങി. മത്സരത്തിലെ താരമായി ഹര്മന്പ്രീത് കൗറിനെയും, ടൂര്ണമെന്റിലെ താരമായി ഷഫാലി വര്മയെയും തിരഞ്ഞെടുത്തു.