ന്യുഡല്ഹി:ദേശീയ പുരസ്കാര വിതരണ ചടങ്ങുമായി ബന്ധപ്പെട്ടുണ്ടായ വിവാദങ്ങളില് മന്ത്രി സ്മൃതി ഇറാനിക്കെതിരെ സംവിധായകന് മേജര് രവി രംഗത്ത്. ഞാന് തീരുമാനിക്കുന്നതുപോലെയാണ് കാര്യങ്ങള് എന്ന സ്മൃതി ഇറാനിയുടെ ധാര്ഷ്ട്യം തെറ്റാണെന്ന് മേജര് രവി പറഞ്ഞു. റിപ്പോര്ട്ടര് ചാനലിന്റെ ന്യൂസ് നൈറ്റില് സംസാരിക്കവെയായിരുന്നു അദ്ദേഹം ഇക്കാര്യം പറഞ്ഞത്.
ഒരു മന്ത്രി എന്ന നിലയില് ജനങ്ങളുടെ ക്ഷേമമാണ് ലക്ഷ്യം വെക്കുന്നതെങ്കില് പതിനൊന്നു പേര് ഒഴികെയുള്ളവര്ക്ക് അവാര്ഡ് നല്കാന് ഉപരാഷ്ട്രപതിയോട് ആവശ്യപ്പെടേണ്ടത് സ്മൃതി ഇറാനിയുടെ കടമയായിരുന്നുവെന്ന് മേജര് രവി പറഞ്ഞു.
അവാര്ഡ് ദാനം കഴിഞ്ഞ് രാഷ്ട്രപതിയുടെ കൂടെ നിന്ന് ഫോട്ടോ എടുക്കാം എന്നു പറയുന്നത് മന്ത്രിയുടെ ധാര്ഷ്ട്യമാണ്. ഫോട്ടോ ഇന്ന് ഫോട്ടോഷോപ്പില് വേണമെങ്കിലും ചെയ്യാം. അതിന് ഇവരുടെ ഔദാര്യത്തിന്റെ ആവശ്യം ഇല്ല. ഏത് സര്ക്കാരിന്റെ ഏത് മന്ത്രിയാണെങ്കിലും ഇത്തരത്തിലുള്ള ധാര്ഷ്ട്യം സഹിക്കാന് ജനങ്ങള്ക്ക് പറ്റില്ലെന്നും അദ്ദേഹം പറഞ്ഞു. മന്ത്രിയുടെ ധാര്ഷ്ട്യത്തെ ബി.ജെ.പി ഗൗരവകരമായി എടുക്കണമെന്നും അദ്ദേഹം കൂട്ടിച്ചേര്ത്തു.