ന്യുഡല്ഹി: ദീപാവലിക്കുശേഷം ദേശീയ തലസ്ഥാനമായ ഡല്ഹിയിലെ വായു ഗുണനിലവാരം അപകടനിലയിലെത്തി. നിരവധി പേര് പടക്കം പൊട്ടിച്ചതിനെ തുടര്ന്ന് മലിനീകരണ തോത് കുതിച്ചുയര്ന്ന നഗരത്തിന്റെ വായു നിലവാരം ‘റെഡ് സോണ്’ എന്ന അത്യന്തം ഗുരുതരതലത്തിലേക്ക് താഴ്ന്നതായി ഡല്ഹി മലിനീകരണ നിയന്ത്രണ സമിതി (ഡിപിസിസി) അറിയിച്ചു. സുപ്രീംകോടതി നിശ്ചയിച്ച രണ്ടു മണിക്കൂര് പരിധിക്കപ്പുറം പടക്കം പൊട്ടിച്ചതാണ് മലിനീകരണ വര്ധനയ്ക്ക് പ്രധാന കാരണം.
ഡല്ഹിയിലെ 38 വായു നിരീക്ഷണ കേന്ദ്രങ്ങളില് 36 എണ്ണം ‘റെഡ് സോണ്’ നില രേഖപ്പെടുത്തിയിട്ടുണ്ട്. ചൊവ്വാഴ്ച രാവിലെ നഗരത്തില് കനത്ത ചാരനിറമുള്ള മൂടല്മഞ്ഞ് വീണതോടെ ദൃശ്യപരതയും ഗണ്യമായി കുറയുകയുണ്ടായി. സാധാരണയേക്കാള് ഉയര്ന്ന താപനിലയും കാറ്റിന്റെ അനുകൂല ദിശയും മലിന ഘടകങ്ങളെ വ്യാപിപ്പിച്ചതായും റിപ്പോര്ട്ടില് പറയുന്നു. ദീപാവലി ദിനത്തില് വൈകുന്നേരം ആറു മുതല് അര്ധരാത്രി വരെ ശബ്ദമലിനീകരണവും വര്ധിച്ചതായി ഡിപിസിസി വ്യക്തമാക്കി. കഴിഞ്ഞ കുറച്ച് വര്ഷങ്ങളായി ദീപാവലി ആഘോഷങ്ങള്ക്കുശേഷം ഡല്ഹിയില് വായു ഗുണനിലവാരത്തില് വന്തോതില് ഇടിവ് സംഭവിക്കുന്നത് തുടരുകയാണ്. വിദഗ്ധര് ശ്വാസകോശ സംബന്ധമായ രോഗികള്ക്കും മുതിര്ന്ന പൗരന്മാര്ക്കും വീട്ടിനകത്ത് തന്നെ തുടരാന് നിര്ദ്ദേശം നല്കി.