റിയാദ്: സൗദി അരാംകോയുടെ എണ്ണശുദ്ധീകരണ ശാലയ്ക്ക് (റിഫൈനറി) നേരെ ഡ്രോണ് ആക്രമണം. മുന്കരുതല് നടപടിയുടെ ഭാഗമായി റിഫൈനറിയുടെ പ്രവര്ത്തനം താത്കാലികമായി നിര്ത്തിവെച്ചു. വിദേശ ഡ്രോണുകള് ഉപയോഗിച്ച് നടത്തിയ ആക്രമണ ശ്രമം പരാജയപ്പെടുത്തിയതായി സൗദി പ്രതിരോധ മന്ത്രാലയം ഔദ്യോഗികമായി സ്ഥിരീകരിച്ചു.
രണ്ട് ഡ്രോണുകള് ഉപയോഗിച്ചാണ് ആക്രമണത്തിന് ശ്രമം നടന്നതെന്ന് പ്രതിരോധ മന്ത്രാലയ വക്താവ് ബ്രിഗേഡിയര് ജനറല് തുര്ക്കി അല് മാലിക്കി അറിയിച്ചു. ആകാശത്തുവെച്ച് തന്നെ സൈന്യം ഡ്രോണുകളെ വെടിവെച്ചിട്ടു. തകര്ക്കപ്പെട്ട ഡ്രോണുകളുടെ അവശിഷ്ടങ്ങള് പതിച്ചതിനെത്തുടര്ന്ന് പ്ലാന്റില് ചെറിയ രീതിയില് തീപിടുത്തമുണ്ടായെങ്കിലും ഉടന് തന്നെ അത് നിയന്ത്രണവിധേയമാക്കി.
ആക്രമണത്തില് ആര്ക്കും പരിക്കേറ്റതായി റിപ്പോര്ട്ടുകളില്ല. സ്ഥലത്തുനിന്നും പുക ഉയരുന്ന ദൃശ്യങ്ങള് സോഷ്യല് മീഡിയയില് പ്രചരിച്ചിരുന്നു. നിലവില് സ്ഥിതിഗതികള് പൂര്ണമായും നിയന്ത്രണവിധേയമാണെന്നും മേഖലയില് സുരക്ഷാ സന്നാഹങ്ങള് ശക്തമാക്കിയതായും അധികൃതര് അറിയിച്ചു.