കോഴിക്കോട്: 2016 മുതല്‍ 2021 വരെയുള്ള അഞ്ച് വര്‍ഷത്തെ മുടങ്ങിയ ശമ്പളം അനുവദിക്കണമെന്നാവശ്യപ്പെട്ട് സംസ്ഥാനത്തെ നോഷണല്‍ അധ്യാപകര്‍ പ്രതിഷേധം ശക്തമാക്കി. 2016-ല്‍ എയ്ഡഡ് സ്‌കൂളുകളില്‍ നിയമിതരായ അധ്യാപകരാണ് ഇതുവരെ ശമ്പളം ലഭിക്കാതിരുന്നത്. ഏകദേശം 7,000ഓളം അധ്യാപകര്‍ക്ക് ഇതിന്റെ ബാധ്യത നേരിടേണ്ടിവരുന്നതായാണ് വിലയിരുത്തല്‍.

നിയമനങ്ങള്‍ക്ക് സര്‍ക്കാര്‍ അംഗീകാരം നല്‍കിയിരുന്നുവെങ്കിലും 2016-2021 കാലയളവിലെ ശമ്പളം വിതരണം ചെയ്തിട്ടില്ലെന്ന് അധ്യാപകര്‍ ആരോപിക്കുന്നു. നിയമനാംഗീകാര ഉത്തരവില്‍ പ്രസ്തുത കാലയളവില്‍ ‘സാങ്കല്‍പിക ശമ്പളം’ മാത്രമേ ലഭ്യമാകൂ എന്ന വ്യവസ്ഥ ഉള്‍പ്പെടുത്തിയതും വിവാദമായിട്ടുണ്ട്. എന്നാല്‍ ആ കാലയളവില്‍ അധ്യാപകര്‍ പൂര്‍ണകാല സേവനം അനുഷ്ഠിച്ചതിനാല്‍ യഥാര്‍ത്ഥ ശമ്പളമാണ് നല്‍കേണ്ടതെന്ന് അവര്‍ ആവശ്യപ്പെടുന്നു.

കോവിഡ് മഹാമാരിയുള്‍പ്പെടെയുള്ള പ്രതിസന്ധികള്‍ക്കിടയിലും ക്ലാസുകള്‍ കൈകാര്യം ചെയ്തതായും ഓണ്‍ലൈന്‍ പഠന സംവിധാനങ്ങള്‍ ഉള്‍പ്പെടെ നടപ്പിലാക്കുന്നതില്‍ പങ്കാളികളായതായും അധ്യാപകര്‍ ചൂണ്ടിക്കാട്ടുന്നു. ചെയ്ത ജോലിക്ക് പ്രതിഫലം ലഭിക്കാതെ സാമ്പത്തിക പ്രതിസന്ധി രൂക്ഷമാണെന്നും അവര്‍ പറയുന്നു.

അതേസമയം, നിയമന പ്രശ്നങ്ങള്‍ പരിഹരിച്ചുവെന്ന പ്രചാരണം സര്‍ക്കാര്‍ ശക്തമാക്കുന്നതിനിടെയാണ് ശമ്പളാവശ്യവുമായി നോഷണല്‍ അധ്യാപകര്‍ സമര രംഗത്തിറങ്ങിയത്. മുടങ്ങിയ ശമ്പളം ഉടന്‍ അനുവദിക്കണമെന്നാവശ്യപ്പെട്ട് വിവിധ ജില്ലകളില്‍ പ്രതിഷേധ പരിപാടികള്‍ തുടരുകയാണ്.

ചേരുവകള്‍

എല്ലില്ലാത്ത ചിക്കന്‍ – 150 ഗ്രാം
മഞ്ഞള്‍പ്പൊടി – 1/4 ടീസ്പൂണ്‍
കശ്മീരി മുളകുപൊടി – 1 ടീ സ്പൂണ്‍
ഇഞ്ചി വെളുത്തുള്ളി പേസ്റ്റ് -1 ടേബിള്‍ സ്പൂണ്‍
സവാള – 2
പച്ചമുളക് – 2
ഗരം മസാല – 1/2 ടീ സ്പൂണ്‍
മൈദ – 1 കപ്പ്
പാല്‍ – 1 കപ്പ് + 2 ടേബിള്‍ സ്പൂണ്‍
സണ്‍ഫ്‌ളവര്‍ ഓയില്‍ -3/4 കപ്പ്
കുരുമുളക് പൊടി – 1/2 ടീ സ്പൂണ്‍
ഉപ്പ് – പാകത്തിന്
കറിവേപ്പില, മല്ലിയില -കുറച്ച് വീതം

തയാറാക്കുന്ന വിധം: ചിക്കന്‍ വൃത്തിയാക്കി കഷണങ്ങള്‍ ആക്കിയ ശേഷം അതിലേക്ക് അല്‍പം മഞ്ഞള്‍പ്പൊടി, കശ്മീരി മുളക് പൊടി, ഇഞ്ചി വെളുത്തുള്ളി പേസ്റ്റ്, പാകത്തിന് ഉപ്പ് എന്നിവ ചേര്‍ത്ത് നന്നായി പുരട്ടി 30 മിനിറ്റ് വയ്ക്കണം.

പാനില്‍ എണ്ണ ചൂടാക്കി ചിക്കന്‍ കഷണങ്ങള്‍ വറുത്തെടുക്കണം. തണുത്ത ശേഷം ഇവ ചെറിയ കഷണങ്ങളാക്കിയെടുക്കണം.
ചിക്കന്‍ വറുത്ത അതേ എണ്ണയില്‍ തന്നെ സവാള അരിഞ്ഞതും ഇഞ്ചി വെളുത്തുള്ളി പേസ്റ്റ്, പച്ചമുളക്, മഞ്ഞള്‍പ്പൊടി, കശ്മീരി മുളകുപൊടി, ഗരംമസാല, മല്ലിയില, കറിവേപ്പില എന്നിവ ചേര്‍ത്ത് വഴറ്റണം.

ഇതിലേക്ക് ചെറു കഷണങ്ങളാക്കിയ ചിക്കന്‍ ചേര്‍ത്ത് ഒന്നു വഴറ്റി ആവശ്യമെങ്കില്‍ ഉപ്പ് പാകത്തിന് ചേര്‍ത്ത് ഇളക്കിയ ശേഷം തീ ഓഫാക്കാം. മുട്ട, പാല്‍, അല്‍പം എണ്ണ, മൈദ, കുരുമുളകുപൊടി, മഞ്ഞള്‍പ്പൊടി, ഉപ്പും എന്നിവ മിക്സിയില്‍ അടിച്ചെടുക്കുക. അടുപ്പത്ത് ഒരു തവ വെച്ച് അതിന്റെ മുകളില്‍ അടികട്ടിയുള്ള പാത്രം വെച്ച ശേഷം മുട്ടക്കുട്ടിന്റെ പകുതി ഒഴിച്ച് 3-4 മിനിറ്റ് മുടിവെച്ച് വേവിക്കുക.

ഇതിലേക്ക് തയാറാക്കി വെച്ചിരിക്കുന്ന ചിക്കന്‍ മസാല കൂട്ട് നല്ലതു പോലെ നിരത്തി വെച്ച് അതിനു മുകളില്‍ ബാക്കി മുട്ടക്കൂട്ട് ഒഴിക്കണം. ഇതിനു മുകളിലായി ചിക്കന്‍ കഷണങ്ങളോ കാപ്സിക്കമോ വെച്ച് അലങ്കരിച്ച് 20-25 മി നിറ്റ് മുടിവെച്ച് വേവിക്കണം. പോള തിരിച്ചിട്ട് 4-5 മിനിറ്റ് മറുവശവും വേവിച്ചാല്‍ ഇറാനി പോള തയാര്‍.

കൊളംബോ: ട്വന്റി-20 ലോകകപ്പില്‍ ഇന്ത്യ-പാകിസ്താന്‍ മത്സരം ഞായറാഴ്ച നടക്കുമെന്ന് ഉറപ്പായതോടെ വിമാന ടിക്കറ്റ് നിരക്കുകളില്‍ വന്‍ കുതിപ്പ്. ആഴ്ചകള്‍ നീണ്ട അനിശ്ചിതത്വങ്ങള്‍ക്കൊടുവില്‍ പാകിസ്താന്‍ കളിക്കാനിറങ്ങുമെന്ന് വ്യക്തമായതോടെയാണ് ടിക്കറ്റിന് ‘തീവില’യായത്.

അവസാന നിമിഷം കളി കാണാന്‍ ടിക്കറ്റ് ബുക്ക് ചെയ്യുന്നവരുടെ എണ്ണം വര്‍ധിച്ചതോടെ പ്രമുഖ നഗരങ്ങളില്‍ നിന്നുള്ള യാത്രാ നിരക്കില്‍ വന്‍ ഉയര്‍ച്ചയാണ് കണ്ടത്. നിലവിലെ ഏകദേശ നിരക്കുകള്‍ താഴെ പറയുന്നവയാണ്:

ഡല്‍ഹി: ₹90,000 മുതല്‍ ₹1,00,000 വരെ.

മുംബൈ: ₹70,000 രൂപയ്ക്ക് മുകളില്‍.

കൊച്ചി / ചെന്നൈ: ₹50,000 രൂപയ്ക്ക് അടുത്ത്.

സാധാരണ നിരക്കിനേക്കാള്‍ പലയിടങ്ങളിലും ആറിരട്ടിയോളം വര്‍ധനവാണ് രേഖപ്പെടുത്തിയത്. കഴിഞ്ഞ കുറച്ചു ദിവസങ്ങള്‍ക്കുള്ളിലാണ് ബുക്കിങ്ങുകളില്‍ ഭൂരിഭാഗവും നടന്നതെന്ന് ട്രാവല്‍ പോര്‍ട്ടലുകള്‍ സൂചിപ്പിക്കുന്നു.

വിമാന ടിക്കറ്റിന് പിന്നാലെ കൊളംബോയിലെ ഹോട്ടല്‍ നിരക്കുകളിലും വര്‍ധന. ബുക്കിങ്ങുകളില്‍ 35 ശതമാനത്തിലധികം വര്‍ധനവുണ്ടായി.

അതേസമയം ഇന്ത്യക്കാര്‍ക്ക് ശ്രീലങ്കയിലേക്ക് യാത്ര ചെയ്യാന്‍ വിസ ആവശ്യമില്ലെന്നത് അവസാന നിമിഷം യാത്ര പ്ലാന്‍ ചെയ്യുന്നവര്‍ക്ക് വലിയ ആശ്വാസമായി. ഇതാണ് ബുക്കിങ് കൂടാന്‍ കാരണമായതെന്ന് ട്രാവല്‍ ഏജന്‍സികള്‍ നിരീക്ഷിക്കുന്നു.