2026 ഫിഫ ലോകകപ്പ് നറുക്കെടുപ്പ് ബഹിഷ്കരിക്കാനൊരുങ്ങി ഇറാന്. ഇറാന് ഫുട്ബോള് ഫെഡറേഷന് പ്രസിഡന്റ് മെഹ്ദി താജ് അടക്കമുള്ള ഇറാനിയന് പ്രതിനിധി സംഘത്തിന് വിസ നിഷേധിച്ചതിനെ തുടര്ന്നാണ് ഡിസംബര് 5 ന് വാഷിംഗ്ടണില് വെച്ച് നടക്കുന്ന ഫിഫ ലോകകപ്പ് നറുക്കെടുപ്പ് ബഹിഷ്കരിക്കാന് തീരുമാനിച്ചതെന്ന് ഇറാന് സ്പോര്ട്സ് വെബ്സൈറ്റ് റിപ്പോര്ട് ചെയ്തു.
ഇറാന് ഫുട്ബോള് പരിശീലകനായ അമീര് ഖലനോയി അടക്കം ഇറാനിയന് പ്രതിനിധി സംഘത്തിലെ നാല് പേര്ക്കാണ് ഡിസംബര് അഞ്ചിന് നടക്കുന്ന നറുക്കെടുപ്പിന് വിസ അനുവദിച്ചിരിക്കുന്നത് എന്നാണ് പുറത്തുവരുന്ന വാര്ത്തകള്. ലോകപ്പ് നറുക്കെടുപ്പില് പങ്കെടുക്കില്ല എന്ന തീരുമാനം തികച്ചും രാഷ്ട്രീയപരമാണെന്നും, ഈ വിവരം ഫിഫ പ്രസിഡന്റ് ഇന്ഫാന്റിനോയെ അറിയിച്ചതായും മെഹ്ദി താജ് അറിയിച്ചു.
ഈ വര്ഷം ജൂണില് 19 രാജ്യങ്ങളിലെ പൗരന്മാര്ക്ക് അമേരിക്കയിലേക്ക് പ്രവേശനം നിഷേധിച്ചതായി ഡൊണാള്ഡ് ട്രംപ് പ്രഖ്യാപിച്ചതില് ഒരു രാജ്യമാണ് ഇറാന്. ഇറാനും അമേരിക്കയും തമ്മിലെ നാല് പതിറ്റാണ്ടോളം നീണ്ട രാഷ്ട്രീയ പ്രശ്നമാണ് ഇപ്പോള് കായികരംഗത്തും പ്രതിഫലിക്കുന്നത്. അടുത്ത വര്ഷം നടക്കാനിരിക്കുന്ന ഫിഫ ലോകകപ്പിലേക്ക് ഇറാന് നേരിട്ട് യോഗ്യത നേടിയിരുന്നു.